Բրիտանուհին ալերգիա ունի ծիծաղից ու արցունքներից (լուսանկարներ)

Բրիտանուհին պատմել է, որ ալերգիա ունի ծիծաղից ու արցունքներից, գրում է Mirror-ը։ Այնուամենայնիվ, սա այն պատճառների ամբողջական ցանկը չէ, թե ինչու է կնոջ մաշկը պատվում բշտիկներով և «այրվում»:

20-ամյա Բեթ Ցանգարիդեսն ալերգիա ունի «ինքն իրենից»։ Բրիտանուհու խոսքով՝ ծիծաղը, արցունքները և նույնիսկ համեմունքների հոտը կարող են իր մոտ անաֆիլակտիկ շոկ, այրվածքներ և մաշկի թեփոտում առաջացնել։ Կինը հավելել է, որ ինքը 15 տարեկանից ապրում է դրանով, իսկ բժիշկներն այն անվանում են «բժշկական առեղծված»:

«Նրանք չեն հասկանում, թե ինչպես կարող է մարմինը նման բան անել», - ասել է Ցանգարիդեսը:

Բեթը նաև շարժունակության հետ կապված խնդիրներ ունի և երբեմն ունենում է ուշագնացություն կամ ցնցումներ: Այդ պատճառով նա չի կարողանում աշխատանք գտնել։ 18 տարեկանում բրիտանուհու մոտ ախտորոշվել է դիրքային օրթոստատիկ հաճախասրտության համախտանիշ։

«Անկախ նրանից, թե շատ եմ ծիծաղում, լաց լինում կամ հուզվում, իմ մաշկը կարող է սկսել այրվել: Կարծես ինձ ողջ-ողջ այրում են, ցավոտ է»,- դժգոհել է նա:

Բացի այդ, մաշկային խնդիրների պատճառով Ցանգարիդեսը դպրոցում ընկերներ չի ունեցել։ Կինը կարծում է, որ այս փաստը բացասաբար է ազդել երիտասարդ տարիքում իր ինքնագնահատականի վրա։ 

Բեթը դեռ բուժման կուրս է անցնում և հուսով է, որ իր վիճակը կբարելավվի: Նա նաև շնորհակալություն է հայտնել ընկերոջը, ով իրեն ցուցաբերում է ամեն տեսակի աջակցություն՝ ինչպես բարոյական, այնպես էլ ֆինանսական։