Մեծ օրակարգ կա, աշխատանքը չպետք է դադարի, ՀՀ-ԵՄ երկխոսության կարիք ունենք․ Մարագոս

Երևանում դեկտեմբերի 11-ին կայացել է ԵՄ-Հայաստան քաղաքացիական հասարակության պլատֆորմի գործունեության շրջանակներում մշակված  խորհրդատվական կարծիքների քննարկումը՝ պետական մարմինների ներկայացուցիչների և այլ շահագրգիռ կողմերի հետ։  

Ինչպես «Արմենպրես»-ին տեղեկացրին «Իրավունքի Եվրոպա միավորում»-ից, քննարկմանը ողջույնի խոսքով հանդես են եկել ՀՀ ԱԳ նախարարի տեղակալ Պարույր Հովհաննիսյանը, Հայաստանում Եվրամիության պատվիրակության ղեկավար, դեսպան Վասիլիս Մարագոսը, ՀՀ արդարադատության փոխնախարար Կարեն Կարապետյանը, ՀՀ Էկոնոմիկայի նախարարի տեղակալ Ռաֆայել Գևորգյանը, ԵՄ-Հայաստան քաղաքացիական հասարակության պլատֆորմի համանախագահ Լուսինե Հակոբյանը։

Հայաստանում Եվրամիության պատվիրակության ղեկավար, դեսպան Վասիլիս Մարագոսն իր խոսքում ընդգծել է, որ իրենք աշխատում են ՀՀ-ԵՄ հարաբերությունների ամրապնդման ուղղությամբ, և այդ օրակարգը շատ կարևոր է։ Նա հիշատակել է անվտանգության խնդիրը, տնտեսության դիվերսիֆիկացիայի հարցը և հույս հայտնել, որ այդ հարցերի քննարկումը հաջող կընթանա Եվրոպայում։

«Ցանկանում եմ ընդգծել ամենակարևորը, որ ՀԸԳՀ-ով մեր հարաբերությունների շրջանակը մեծ ներուժ ունի, և այդ հեռանկարը գրավիչ է բոլոր դերակատարների համար, գրավիչ է բոլոր շահագրգիռ կողմերի համար, այն մոբիլիզացնում է Հայաստանի մասնագետներին քաղհասարակությունից, ինչպես նաև մասնագիտական ասոցիացացաները ու անհատ խորհրդատուներին։ Այդ հեռանկարն աչքի առաջ ունենալով՝ ուզում եմ ընդգծել այն ազդակի որակը, որ մենք ստացել ենք, և այստեղ ես չեմ խոսում միայն ակադեմիական որակի մասին, քանի որ դուք այն զգալի չափով ունեք, ես նաև խոսում եմ չափման և գնահատման մասին՝ թե ինչն է հնարավոր, ինչն է իրատեսական, ինչպես նաև գաղափարների մասին, թե դրանք ինչպես կարող են կիրարկվել»,- նշել է դեսպանը՝ հավելելով, որ այստեղ կարևորվում է շահագրգիռ կողմերի ամբողջ ներուժը՝ ներուժը երկրում, վարչական ներուժը, հանրային կառավարումը։

«Ես չեմ հավատում, որ հանրային կառավարումը պետք է քաղաքացիական հանրությունից, կամ մասնավոր հատվածից ինչ-որ կղզիացած, մեկուսացած բան լինի, մեզ անհրաժեշտ է համագործակցություն, դուք երկու կողմում պետք է մոբիլիզացնենք ձեր ռեսուրսները՝ մտավոր, քաղաքական, սոցիալական ռեսուրսները, դուք ունեք բոլոր կողմերի կարողությունների կարիքը, համագործակցության կարիքը»,- նշել է դեսպանը։

Նա նկատել է, որ վերջին շրջանում իրենք շատ են աշխատում մասնավոր հատվածի հետ՝ ազդարարելով, որ շուտով արդեն ի հայտ կգա մասնավոր հատվածին ուղղված բազմաթիվ ներդրումներով տնտեսական ներդրման պլանը։

«Մենք արդեն կատարում ենք մեր խոստումներն այս ոլորտում, գիտեմ, որ պետք է ձգտենք ավելիին, պետք է հաղորդակցենք ավելի լավ, բայց ես շատ տպավորված էի օրեր առաջ, երբ մենք Կենտրոնական բանկումմ գործարկեցինք նոր երաշխիքային ծրագիրը, որը նոր հնարավորություններ կտա մասնավոր հատվածում ներդրումների համար․ և դա միայն շուկայում վաճառքը չէ, այն կապված է կանաչ և թվային անցման հետ, այն կապված է ձեր արտադրանքի որակի բարձր չափանիշներին ադապտացման հետ։ Աշխատանքն արդեն սկսված է, բայց չափազանց կարևոր է, որ այն շարունակվի, նոր թափ ստանա»,- նշել է Մարագոսը՝ հավելելով․ «Շատ կարևոր տարր է առաքելությունը, որը հիշատակվեց, ինչը ևս համաձայնեցրել ենք, մենք աշխատելու ենք միասին ներդրումային պլատֆորմում, որպեսզի արագացնենք ներդրումների կատարումը»։  

«Մեծ օրակարգ կա, աշխատանքը չպետք է դադարի, մենք ավելի շատ երկխոսության կարիք ունենք, չպետք բավարարվել միայն ՀԸԳՀ Պլատֆորմի ֆորմալ հանդիպումներով, որոնք տեղի են ունենում տարին մեկ-երկու անգամ, ուստի, խնդրում եմ շարունակեք այս աշխատանքը»,- հայտարարել է ՀՀ-ում ԵՄ պատվիրակության ղեկավարը։

Ավելին՝ սկզբնաղբյուր կայքում։