Նախարար Մկրտչյանը հանդիպում է ունեցել Բադր Ալ Բադրի հետ

Աշխատանքի և սոցիալական հարցերի նախարար Նարեկ Մկրտչյանը Էր Ռիյադում հանդիպում է ունեցել Սաուդյան Արաբիայի թագաժառանգ, վարչապետ Մուհամեդ Բին Սալմանի հիմադրած «Մուհամեդ Բին Սալման (MiSK)» հիմնադրամի գործադիր տնօրեն Բադր Ալ Բադրի հետ։

Հանդիպման ընթացքում քննարկվել են սոցիալական պաշտպանության ոլորտում փոխադարձ հետաքրքրություն ներկայացնող մի շարք հարցեր, այդ թվում՝ տեղեկատվական հաղորդակցության գործիքների արդյունավետ կիրառման, երիտասարդների շրջանում մասնագիտական կարողությունների զարգացման, ինչպես նաև ուսումնական կենտրոնների ստեղծման վերաբերյալ․ դիտարկվել է նաև հայաստանյան հիմնադրամների և MiSk-ի հետ համագործակցության հնարավորությունը։

Անդրադարձ է կատարվել նաև սոցիալական պաշտպանության համակարգում տեխնոլոգիական նորարարությունների իրականացման կարևորությանը։ Այս համատեքստում նախարար Մկրտչյանը խոսել է «Արհեստական ինտելեկտը սոցիալական ապահովության ոլորտում» ծրագրի մասին, որը հնարավորություն է տալիս արհեստական բանականության կանխորոշիչ գործիքների միջոցով իրականացնել կարիքի առավել թիրախային գնահատում, ինչպես նաև նոր տեխնոլոգիաների միջոցով վերլուծել թիրախային խմբերի առանձնահատկությունները։ Նախարարի խոսքով՝ համատեղելով արհեստական բանականության ընձեռած հնարավորությունները, նախատեսվում է նաև վերհանել և վերլուծել կարիքի գնահատման համակարգի արդյունավետությունը։

Ալ Բադրը ներկայացրել է հիմնադրամի կողմից իրականացվող աշխատանքները և նշել, որ իրենց գործունեության առանքում կրթության և ձեռներեցության ոլորտների զարգացմանն ուղղված ծրագրերն են։ MiSK հիմնադրամի գործադիր տնօրենը պատրաստակամություն է հայտնել փորձի փոխանակում և համատեղ նախաձեռնություններ իրականացնել այս ուղղություններով ևս։