ՌԴ ԱԳՆ–ն Հայաստանին մեղադրել է եռակողմ պայմանավորվածությունները խախտելու մեջ

Չենք կարող չնշել Երևանի մի շարք գործողություններ, որոնց պատճառով հնարավոր չեղավ ամբողջությամբ իրականացնել եռակողմ պայմանավորվածությունները։ Մենք արդեն նշել ենք այս կետերը։ Բանն այն է, որ հայկական կողմը 2022 թվականի հոկտեմբերին Պրահայում ԵՄ հովանու ներքո անցկացվող գագաթնաժողովում 180 աստիճանով փոխեց իր դիրքորոշումը Ղարաբաղի հարցում՝ ճանաչելով դրա պատկանելությունը Ադրբեջանին և «մոռանալով» միևնույն ժամանակ, Եվրամիության խորհրդականների հուշումով, գոնե նշել այս տարածաշրջանի հայ բնակչության իրավունքների և անվտանգության պատշաճ ապահովման անհրաժեշտությունը։ Այս որոշումը արմատապես փոխեց իրավիճակը ռուսական խաղաղապահ զորախմբի տեղակայման գոտում։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Ըստ ՌԴ ԱԳՆ ներկայացուցչի՝ հայկական կողմը, իբր, «Լաչինի միջանցքն օգտագործել էր Ղարաբաղին սպառազինություն մատակարարելու համար՝ խախտելով եռակողմ պայմանավորվածությունները», ինչպես նաև «ամբողջությամբ դուրս չէր բերել հայկական զինված ստորաբաժանումները տարածաշրջանից, ինչը մեծ մասամբ հանգեցրեց բախումների այս տարվա սեպտեմբերին»։ 

«Հայկական կողմը երկար ամիսներ արգելափակել է Ադրբեջանի և Հայաստանի միջև երկաթուղային հաղորդակցության վերականգնման աշխատանքների մեկնարկը՝ հրաժարվելով կատարել 2020 թվականի նոյեմբերի 9-ի բարձր մակարդակի հայտարարության 9-րդ կետի դրույթները»,– նշել է նա։