Գերեզմաններում սրբապղծություններ են արել, փախուստի դիմել․ պարեկները «որսացել են» նրանց

ՀՀ Ներքին գործերի նախարարության Ոստիկանության Պարեկային ծառայությունում օպերատիվ  տեղեկություններ են ստացվել, որ սրբապղծություններ են կատարվում գերեզմաններում, հիմնականում գիշերային ժամերին, գրում է Shamshyan-ը։ 

Աղբյուրը գրում է․ «Այսօր՝ դեկտեմբերի 18-ին, ՊԾ Երևան քաղաքի գնդում ժամը 04։30-ի  սահմաններում օպերատիվ տեղեկություններ են ստացվել, որ Չարբախի գերեզմաններում Niva մակնիշի ավտոմեքենա կա, որի մեջ գտնվող անձինք, հնարավոր է, իրենց սև գործն են անում։

Տեղում ՊԾ Երևան քաղաքի գնդի հրամանատար Ա․ Իսախանյանի որոշմամբ Երևանի գնդի 4-րդ գումարտակի հրամանատար Արմեն Գասպարյանի գլխավորությամբ մի խումբ պարեկներ գերեզմանատան տարբեր հատվածներում, ժողովրդի լեզվով ասած, «զասադ» են նստում։ Տեղում Ա․ Իսախանյանը իրականացնում է «Հանդերձյալ աշխարհում էլ պարեկները դաբրո ունեն» օպերացիան։ 

Կարճ ժամանակ անց պարեկները համոզվում են, որ տեղեկությունը հավաստի է և 4-րդ գումարտակի 3-րդ վաշտի պարեկներ Ռազմիկ Լալայանն ու Վարդան Միրզոյանը նկատում են կասկածելի Niva-ն և կանգնեցնում, սակայն «գող կատվի նման» նրանք դիմում են փախուստի։ Սկսվում է հետապնդումը ու քանի որ Niva-ն ուղևորվում է դեպի Արմավիրի մարզ, տեղեկությունը փոխանցվում է ՀՀ ՆԳՆ ոստիկանության Արմավիրի մարզային վարչություն և վարչության պետ Արթուր Բդոյանի հանձնարարականով մարզի քրեական հետախույզներն ու ՊԾ Արմավիրի մարզի գումարտակի պարեկները ուղևորվում են Niva-ի ենթադրյալ գտնվելու վայրի ուղղությամբ։

Երևանի գնդի պարեկներին հաջողվում է նրանցից մեկին բռնել, իսկ մյուսին հաջողացնում է բռնել ՊԾ Արմավիրի մարզի գումարտակի 1-ին վաշտի 1-ին դասակի պարեկ Արամայիս Սարգսյանը, ով մոտ 600 մ հետապնդում է ճիվաղին, սակայն կարողանում է «որսալ» նրան։

Երբ տականքները պարեկների կողմից բռնվում են, ավտոմեքենայի մեջ հայտնաբերվում է գերեզմանոցներից թալանված մեծ քանակի ալյումինե ճաղավանդակներ»։ 

Ավելին՝ սկզբնաղբյուր կայքում։