Գործընթացները հույս են ներշնչում․ ՀՀ գլխավոր դատախազը՝ Միհրան Պողոսյանի գործի մասին

Հայաստանում 2023 թվականին թմրամիջոցների ապօրինի շրջանառության 3,5 մլրդ դրամի փողերի լվացման մեղադրանքներ կան։ Այս մասին Հանրային հեռուստաընկերության եթերում հայտնել է ՀՀ գլխավոր դատախազ Աննա Վարդապետյանը։

«Քրեական հետապնդում է հարուցվել 172 անձի նկատմամբ՝ նախորդ տարվա 115-ի համեմատ։ Դատարան են ուղարկվել կրկնակի ավել գործեր՝ ամբողջ 2022 թվականի 32 վարույթների դիմաց: Փողերի լվացում հոդվածը կիրառվում է թմրանյութերի ապօրինի շրջանառության հետ, քանի որ դրանց առևտուրն իրականացվում է տելեգրամյան ալիքների միջոցով՝ օգտագործելով էլեկտրոնային դրամապանակներ և կրիպտոարժույթներ», - հայտնել է գլխավոր դատախազը։

Նա նաև նշեց, որ Միհրան Պողոսյանի վերաբերյալ աշխատանքներ են տարվում ՌԴ Գլխավոր դատախազության հետ, որպեսզի անձը կարողանա փոխանցվել Հայաստան, քանի որ վերջինս գտնվում է այնտեղ և ունի փախստականի կարգավիճակ:

Վարդապետյանի խոսքով՝ Միհրան Պողոսյանը ոչ միայն մեկ տոննա թմրանյութի մաքսանենգության գործի շրջանակներում է հետապնդվում, այլ նաեւ Հակակոռուպցիոն կոմիտեում նրա հետ կապված վարույթ կա հարուցված, նաեւ կա դրվագ նրա կնոջ հետ կապված:

«Մենք ունենք տվյալներ, որ կինը գույք է ձեռք բերել Իսպանիայում՝ Գրանադայում, եւ այս մասով եւս վարույթ կա հարուցված»,-ասել է նա՝ նշելով, որ Պողոսյանին վերադարձնելու իրավական գործընթացները հույս են ներշնչում:

Մանրամասները՝ տեսանյութում։