Թուրքիայի ԱԳ նախարարը խոսել է Հայաստանի հետ հարաբերությունների կարգավորման գործընթացի մասին

Մենք կշարունակենք  Հայաստանի հետ սկսված հարաբերությունների կարգավորման գործընթացը՝ Ադրբեջանի հետ լիարժեք համակարգելով՝ հաշվի առնելով տարածաշրջանում տեղի ունեցող զարգացումները։ Այս մասին երկրի խորհրդարանում ելույթի ժամանակ հայտարարել է Թուրքիայի արտգործնախարար Հաքան Ֆիդանը։

Նախարարի խոսքով՝ մի շարք երրորդ երկրների կողմից՝ 1915 թվականին տեղի ունեցած Հայոց ցեղասպանության վերաբերյալ «մեղադրանքներ առաջադրելու փորձերը» կխաթարեն կարգավորման գործընթացը. «Այս երկրները լավություն չեն անում Հայաստանի համար։ «3+3» հարթակը, որը մենք գլխավորում ենք Ադրբեջանի հետ Հարավային Կովկասում, առաջին անգամ տեղի ունեցավ Թեհրանում նախարարների մակարդակով։ Հաջորդ հանդիպումը կկայանա Թուրքիայում 2024 թվականին»,– ասել է նա։

Ֆիդանը նաև նշել է, թե Ադրբեջանի և Հայաստանի միջև խաղաղության պատմական շանս կա։

Նրա խոսքով՝ Թուրքիան գոհ է երկու երկրների միջև ավելի մեծ վստահության հասնելու ուղղությամբ ձեռնարկվող կոնկրետ քայլերից և հույս ունի, որ խաղաղության պայմանագիրը կստորագրվի որքան հնարավոր է շուտ։