Սերբիայի վարչապետը շնորհակալություն է հայտնել Ռուսաստանին

Ռուսական անվտանգության ծառայությունները նախազգուշացրել են Սերբիային Բելգրադում սպասվող անկարգությունների մասին։ Այս մասին TV Pink-ի եթերում հայտարարել է հանրապետության վարչապետ Անա Բռնաբիչը։

«Մենք ունեինք տվյալներ ծառայություններից, որոնք նախազգուշացրել էին այս մասին: Առաջին հերթին մեզ նման տեղեկություն է տրամադրել ՌԴ անվտանգության ծառայությունը»,- ասել է նա։

Բռնաբիչը նշել է, որ «բոլորը» մեղադրել են Բելգրադին ապատեղեկատվություն տարածելու մեջ։ Նրա խոսքով՝ «շատերը գիտեին անկարգությունների նախապատրաստման մասին և չէին ուզում օգնել»։

Ինչպես հայտնել ենք, դեկտեմբերի 24-ին ընդդիմադիր «Սերբիան ընդդեմ բռնության» դաշինքի կողմնակիցները փորձել են ներխուժել Բելգրադի վարչակազմի շենք։ Իրավապահները փակել են շենքի մուտքը։ Կոալիցիայի ներկայացուցիչները դժգոհություն են հայտնում Սերբիայում դեկտեմբերի 17-ին կայացած ընտրությունների արդյունքներից։ Բելգրադում կայացած ընտրությունների արդյունքներն առաջացրել են ընդդիմության ամենամեծ քննադատությունը։

Բողոքի ակցիաների ֆոնին Վուչիչը դիմել է ժողովրդին, որում ընդգծել է, որ Սերբիայում հեղափոխություն չի լինի։ Նա խոստացել է, որ «ավազակներին» կձերբակալեն, իսկ իրավապահ մարմինները կշարունակեն գործել օրենքի շրջանակներում։ Սերբիայի նախագահը նաև շնորհակալություն է հայտնել օտարերկրյա հետախուզական ծառայություններին, որոնք Բելգրադին զգուշացրել են երկրում անկարգությունների նախապատրաստման մասին։