Նրանք հաշվարկե՞լ են բոլոր վտանգները, որոնք կախված են ոչ թե իրենց, այլ պետության և հայրենիքի գլխին․ Արամ Սարգսյան

Այս պահին տեղի է ունենում «Միասին» շարժման ասուլիսը՝ նախատեսվող հանրահավաքին ընդառաջ։ Շարժման նախաձեռնող, ՀԴԿ կուսակցության նախագահ Արամ Սարգսյանն իր խոսքում տեղեկացրեց, որ առաջիկա հանրահավքը տեղի է ունենալու փետրվարի 29-ին, ժամը՝ 17։00-ին։ Նա նաև ավելացրեց՝ այդ օրը հանրությանը ներկայացնելու են իրենց կողմից արդեն իսկ հայտարարված քաղաքական օրակարգը՝ բանակցային գործընթացի, ՀՀ կառավարման ապագա համակարգի վերաբերյալ։ Նրա պնդմամբ՝ ժողովրդի աջակցությամբ իրենք պետք է հասնեն Փաշինյանի հրաժարականին։

Սարգսյանը նաև անդրադարձ կատարեց վերջին օրերին Հայաստանի արտաքին քաղաքական դաշտում տեղի ունեցող իրադարձություններին․

«Հնարավոր չի պատկերացնել մի պետություն, որի ղեկավարը առաջնորդվում է մյուս պետության գաղտնի ծառայության ղեկավարի հանձնարարություններով։ Ես իրավունք ունեմ սա հայտարարելու, որովհետև Փաշինյանը Մյունխենյան այցից հետո չի բացատրել, թե ի՞նչ գործ ուներ վարչապետը Գաղտնի ծառայության պետի հետ քննարկում անցկացներ։ Եթե այդ ամենում ռեալ գաղտնիք չկա, ապա մենք պետք է դրանից տեղյակ լինենք»,- նման տեսակետով հանդես եկավ շարժման նախաձեռնողն ու թեման շարունակելով ընդգծեց՝

«Սա ինչու՞ եմ ասում, որովհետև մենք տեսանք հետևյալը․ վերադարձից հետո Փաշինյանը հայտարարեց ՀԱՊԿ-ին անդամակցության սառեցման գործընթացի մասին և ամենազավեշտալին եղավ այն, որ Ուկրաինայի նախագահ Զելենսկին պատրաստվում է գալ Հայաստան։ Թշնամական հարաբերություններ են ձևավորվելու Ռուսաստանի հետ և ես ուզում եմ հասկանալ՝ նրանք հաշվարկե՞լ են բոլոր վտանգները, որոնք կախված են ոչ թե իրենց գլխին, այլ պետության և հայրենիքի»,- նման հարցադրմամբ հանդես եկավ Սարգսյանը՝ թեմայի մասին իր խոսքն ամփոփելով։