ՀՀ-ից դուրս արտագնա աշխատողներին վերաբերվող նախագիծը հանրային քննարկման փուլում է. ՊԵԿ նախագահ

Հայաստանի Հանրապետության տարածքից դուրս արտագնա աշխատանքի մեկնած ՀՀ քաղաքացիների մասով օրենսդրական փոփոխությունների նախագիծն արդեն տեղադրված է e-draft իրավական ակտերի նախագծերի հրապարակման միասնական կայքում։

Լրագրողների հետ ճեպազրույցում այս մասին ասաց Պետական եկամուտների կոմիտեի նախագահ Ռուստամ Բադասյանը։

Նա նշեց, որ արտագնա աշխատանքի մեկնած ՀՀ քաղաքացիները օրենքով սահմանված ժամանակահատվածի համար չեն հարկվի Հայաստանում, եթե եկամտի ստացման երկրում վճարել են եկամտային հարկ:

«Նախագիծը հանրային քննարկման փուլում է։ Օբյեկտիվ բոլոր դժգոհությունները հաշվի ենք առել և փոփոխություններ ենք նախատեսել»,-ավելացրեց Բադասյանը։

Նրա խոսքով՝ թե՛ արտասահմանում, թե՛ Հայաստանում ստացված եկամուտները Հայաստանի Հանրապետությունում ենթակա են հարկման այն տարբերությամբ, որ արտասահմանում վճարված հարկերը կրկնակի հարկերը բացառող համաձայնագրերի ուժով կարող են չվճարվել։

«Ամենևին ընդունելի չեն բոլոր այն պնդումները, թե, օրինակ՝ ինչու՞ պետք է ես հարկ վճարեմ։ Վերաբերմունքը մեր հարկային մշակույթի և հարկային քաղաքականության նկատմամբ պետք է փոխվի։ Մենք հարկ չենք տալիս ուղղակի անվերադարձ, այլ հարկի դիմաց ստանում ենք անվտանգություն, սոցիալական ապահովագրություն և այլն»,-եզրափակեց Բադասյանը։