9 ամիս հաշվել են, թե երբ կարող են ներկայացնել օրենքի նախագիծը․ Արմենուհի Կյուրեղյան

Այսօր ԱԺ-ում քննարկվում էր Կառավարության կողմից ներկայացված «Բնակչության բժշկական օգնության և սպասարկման մասին օրենքում փոփոխություններ կատարելու մասին օրենքի նախագիծը» առաջին ընթերցմամբ ընդունելու մասին հարցը։

 

Ընդդիմադիր պատգամավոր Արմենուհի Կյուրեղյանն իր խոսքում դիմեց հիմնական զեկուցող՝ Առողջապահության նախարարի տեղակալ Արման Գասպարյանին և ՔՊ-ական պատգամավորներին․

 

«Ի՞նչ է կատարվում այստեղ․ փաստացիորեն, 2022 թվականի հոկտեմբերին միաձայն ընդունեցիք օրենք, որով լիցենզավորման ժամկետ սահմանեցիք 2024-ի հունվարի 1-ը, և որևէ մեկդ չհարցրիք՝ արդյո՞ք այդ ժամկետները բավարար են, արդյո՞ք այդ լիցենզավորման համար սուբյեկտներին որոշակի գործողություններ են պետք, որոնք հնարավոր չէր մինչև 2024 թվականը իրականացնել։ Չհարցրիք՝ համարելով, որ եթե Կառավարությունը ներկայացրել է, ուրեմն ներկայացրել է որոշակի հաշվարկներ կատարելով, բայց փաստացի այսօր ներկայացվում է մի նախագիծ, որով առաջարկվում է հունվարի 1-ի ժամկետը երկարացնել մինչև մյուս տարի հունվարի 1։

 

Երբ հանձնաժողովում ես հարցնում էի՝ ե՞րբ ճշտվեց դրա անհրաժեշտությունը, պարզվում է՝ ճշտվել է 2023-ի օգոստոսին, այսինքն՝ 9 ամիս հաշվել են, թե երբ կարող են ներկայացնել։

 

Ինչքա՞ն կարելի է այսպիսի վերաբերմունք ցուցաբերել Ազգային ժողովի նկատմամբ, ինչու՞ չեք հարցնում՝ ո՞վ էր պատասխանատուն այս սխալի և ինչքա՞ն կարելի է բերածը դակել, ինչքա՞ն կարելի է Կառավարությունը անորոշ, թափթփված ինչ-որ որոշումներ բերի, դուք էլ կոճակը սեղմեք ու անցնեք առաջ»,- իր վրդովմունքն արտահայտեց Կյուրեղյանը։