Իրականության բացահայտման ճանապարհին Սերժ Սարգսյանի հայտարարությունը համարում եմ օգտակար․ Փաշինյան

Այսօր ԱԺ-ում ՀՀ վարչապետ Նիկոլ Փաշինյանն անդրադարձել է փետրվարի 16-ին ՀՀ երրորդ նախագահ Սերժ Սարգսյանի կողմից արված այն հայտարարությանը, ըստ որի՝ «Ես տեսնում էի՝ արհավիրք է մոտենում, դա էր ինձ դրդել կրկին առաջադրվել վարչապետ»․

«Պետք է ասեմ՝ իրականության բացահայտման ճանապարհին այդ հայտարարությունը համարում եմ օգտակար։ Այնտեղ կոնտեքստից և հարց ու պատասխանից զգացվում է, որ խոսքը Լեռնային Ղարաբաղի խնդրի շուրջ առաջացող բարդությունների մասին է, շատ կաևոր է, որ հիմա հետահայաց Սերժ Սարգսյանն այդ մասին հայտարարում է, որովհետև այն ժամանակ, երբ ինքը կայացրել էր որոշում՝ վերստին առաջադրվել վարչապետի թեկնածու, ինքը ասում է, որ այդ պահին իմացել է վերահաս արհավիրքի մասին։

Հետևաբար՝ սա ոչ միայն վերահաստատում է 2018 թվականի դրությամբ ԼՂ հարցի բանակցային գործընթացի վերաբերյալ մեր գնահատականները, այլև նոր նյուանս է ավելացնում, ավելի ուժեղացնում այդ գնահատականները, որովհետև եթե Սարգսյանը գիտեր մոտեցող արհավիրքի մասին՝ առնվազն դա զրոյացնում է այս ընթացքում նրանց այն հայտարարությունները, թե իրենք դիվանագիտական հաղթանակների իրավիճակում են եղել 2017-2018 թվականներին»,- իր ելույթում նման տեսակետով հանդես եկավ Փաշինյանն ու հարց ուղղեց՝ այդ դեպքում վերահաս արհավիրքի մասին ՀՀ ժողովրդին ինչու՞ չի տեղեկացվել։