Գազպրոմն ունի 500 մլրդ դրամի շահույթ, ՀԷՑ-ը՝ 40 մլն․ չպետք է այս շահույթները ՀՀ-ից դուրս բերվեն․ Բագրատյան

Այսօր Ազգային ժողովի նիստի ընթացքում ելույթով հանդես եկավ «Քաղաքացիական պայմանագիր» խմբակցության պատգամավոր Սերգեյ Բագրատյանը։

Ըստ նրա՝ մենք կարևորագույն ընտրության առաջ ենք կանգնել և այդ ընտրությունը պետք է կատարենք ճիշտ․ «Մասնավորապես՝ հանրային ծառայությունները կարգավորող հանձնաժողովի ներկայացրած հաշվետվությունը մտածել է տալիս, թե ինչպես պետք է կառավարել դա, որպեսզի մենք մեր պետական շահը կարողանանք ճիշտ սպասարկել։

Այն բիզնեսները, որ կան՝ գազի, Էլեկտրաէներգիայի, ջրի, դրանք սովորական բիզնեսներ չեն, դրանք մոնոպոլիաներ են, բնական մենաշնորհներ։ Այսինքն, եթե դիտարկենք պարզ, մարդկային հասկացությամբ՝ բիզնես արտոնություն են։

Նման ծառայություններ իրականացնող ընկերությունները նշում են, որ իրենք լուրջ ծառայություներ են մատուցում Հայաստանի Հանրապետությանը, այո, դա այդպես է, բայց, որպեսզի մենք կարողանանք հանրային ծառայությունը կարգավորող հանձնաժողովի աշխատանքի վրա լավ իմաստով հանրային ճնշում ունենալ, առաջին հերթին պետք է նայենք՝ ի՞նչ շահույթներ ունեն այս կազմակեպությունները։ Օրինակ՝ «Գազպրոմ Արմենիան» 98 մլրդ դրամ շահութահարկ է վճարել, այսինքն՝ շուրջ 500 մլրդ դրամի շահույթ է ունեցել։ Կամ ՀԷՑ-ի շահույթը 40 մլն-ի կարգի է։

ՀՀ քաղաքացու գրպանից շահույթի գեներացումը պետք է անպայման քաղաքացու ուշադրության կենտրոնում լինի, չպետք է այս շահույթները ՀՀ-ից դուրս բերվեն»,- նման համոզմունք հայտնեց իշխանական պատգամավորն ու ավելացրեց՝ պետք է բոլոր հնարավոր օրինական գործիքներով այս շահույթների մի մասը ուղղել ՀՀ տնտեսության զարգացմանը։