Քնում-զարթնում են՝ բաներ են իմանում մեր երկրի մասին․ Մամիջանյանը՝ ՔՊ-ին

«Չեք հավատա՝ ժամանակին փաստացի բոլոր երկրների ներկայացուցիչները ասում էին, որ Հայաստանին հաջողվել է անհնարինը՝ իրականցնել և՛, և՛-ի քաղաքականություն, իրականացնել կոմպլեմենտար քաղաքականություն, ստանալ երկրի համար լավագույնը և՛ այս միավորից, և՛ այն միավորից»,- այսօր ԱԺ-ում լրագրողների հետ զրույցում նման կարծիք է հայտնել ընդդիմադիր «Պատիվ ունեմ» խմբակցության պատգամավոր Հայկ Մամիջանյանը։

Նա նաև պատասխանել է լրագրողի հարցին, որը վերաբերում էր «Զվարթնոց» օդանավակայանում և Ներքին Հանդում տեղակայված ռուս սահմանապահներին․

«Ինձ հետաքրքրիր է՝ երկա՞ր են այդ բացահայտումները շարունակվելու ՔՊ-ում, քնում-զարթնում են՝ բաներ են իմանում մեր երկրի մասին։ Ամենահանճարեղը կայանում է նրանում, որ երբ ԱԺ իրավական հանձնաժողովի ղեկավարին ու ՔՊ ֆրակցիայի քարտուղարին հարցնում են՝ «Զվարթնոցում» ռուսների տեղակայման պայմանագրային հիմքը ո՞րն է, ասում են՝ չգիտեմ, Ներքին Հանդի պայմանագրային հիմքը ո՞րն է, նորից ասում են՝ չգիտեմ»,- հարցի վերաբերյալ նման կերպ արտահայտվեց Մամիջանյանն ու հավելեց, որ ինքն անձամբ ռուսների տեղակայումը չի դիտարկում որպես ինքնիշխանության կասկած, որովհետև այդ ներկայությունը պայմանավորված է նրանով, որ դա ՀԱՊԿ արտաքին սահման է․ 

«Այնպես որ, ինձ ավելի շատ անհանգստացնում է ադրբեջանցիների առկայությունը Ջերմուկից մի կիլոմետր այն կողմ, Վարդենիսից մի քիչ այն կողմ, Սյունիքում։ Ինձ անհանգստացնում  է Եռաբլուրի դրոշների ճողփյունի ձայնը, այլ ոչ թե այն, ինչ իրենք մի քանի օր առաջ հայտնաբերել են ու որոշել սարքել հերթական զզվելի մանիպուլյացիա։ Երկիրը պատերազմի վտանգի տակ է, իրենք տունտունիկ են խաղում»,- ավելացրեց ընդդիմադիր պատգամավորը։