Մասկը զրկվել է աշխարհի ամենահարուստ մարդու տիտղոսից

Amazon-ի հիմնադիր Ջեֆ Բեզոսը կրկին գլխավորել է աշխարհի ամենահարուստ մարդկանց վարկանիշը՝ ըստ Bloomberg Billionaires Index-ի տվյալների: Վերջին ութ ամիսների ընթացքում այս տիտղոսը պատկանում էր Tesla-ի, SpaceX-ի և X սոցիալական ցանցի (Twitter) սեփականատեր Իլոն Մասկին։

Բեզոսի կարողությունը մարտի 5-ի դրությամբ գնահատվում է 200 մլրդ դոլար, Մասկինը՝ 198 մլրդ դոլար։ Վարկանիշի առաջատարի փոփոխությունը տեղի է ունեցել այն բանից հետո, երբ նախորդ օրը Tesla-ի բաժնետոմսերն ընկել են ավելի քան 7,5%-ով՝ ընկերության էլեկտրական մեքենաների վաճառքի անկման լուրերի ֆոնին։ 

Աշխարհի ամենահարուստ մարդկանց ցուցակում երրորդ տեղը զբաղեցնում է LVMH խմբի սեփականատեր Բեռնար Արնոն՝ 197 մլրդ դոլարով։ Նրան հաջորդում է Meta-ի ղեկավար Մարկ Ցուկերբերգը, ում կարողությունը գնահատվում է 179 միլիարդ դոլար։ Առաջին հնգյակը եզրափակում է Microsoft-ի հիմնադիր Բիլ Գեյթսը 150 միլիարդ դոլար կապիտալով։