Զելենսկին նամակ է հղել Ալիևին

Ուկրաինայի նախագահ Վլադիմիր Զելենսկին նամակ է հղել Ադրբեջանի նախագահ Իլհամ Ալիևին և շնորհավորել նախագահի պաշտոնում վերընտրվելու կապակցությամբ։

Նա նշել է, որ «Ալիևի վերընտրությունը կնպաստի երկկողմ կապերի հետագա ամրապնդմանը և նոր դինամիկ մակարդակի կբերի ուկրաինա-ադրբեջանական համագործակցությունը»։

«Ուկրաինայի և Ադրբեջանի փոխադարձ աջակցությունը՝ միջազգայնորեն ճանաչված սահմաններում երկու պետությունների անկախությանը և տարածքային ամբողջականությանը չափազանց կարևոր է։ Ադրբեջանի Հանրապետության համերաշխությունն առանձնահատուկ նշանակություն է ստանում այսօր, երբ ուկրաինացի ժողովուրդը պաշտպանում է իր ազատությունը Ռուսաստանի դեմ պայքարում։ Մենք երախտապարտ ենք մարդասիրական օգնության, Ռուսաստանի հետ պատերազմից տուժած քաղաքների ենթակառուցվածքի վերականգնման գործընթացին մասնակցելու և ազատագրված ուկրաինական տարածքների ականազերծման գործընթացին մասնակցելու համար»,– ասվում է նամակում։

Զելենսկին հույս է հայտնել, որ Ալիևը կմասնակցի Շվեյցարիայում կայանալիք Խաղաղության առաջին գագաթնաժողովին։