Թրամփը հայտարարել է` Fox News-ի հետ պայմանավորվել է Քամալա Հարիսի հետ բանավեճի շուրջ

ԱՄՆ նախկին նախագահ և Հանրապետական ​​կուսակցությունից պետության ղեկավարի թեկնածու Դոնալդ Թրամփը հայտարարել է, որ պայմանավորվել է Fox News հեռուստաալիքի հետ իր հիմնական հակառակորդի՝ ներկայիս փոխնախագահ Քամալա Հարիսի հետ բանավեճի շուրջ։ Այս մասին նա հայտնել է իր Truth Social սոցիալական ցանցում։

Թրամփի խոսքով՝ բանավեճը նախատեսված է սեպտեմբերի 4-ին՝ Փենսիլվանիայում։ Հարիսը դեռ չի մեկնաբանել այս տեղեկությունը:

«Ես պայմանավորվածություններ եմ ձեռք բերել Fox News-ի հետ՝ չորեքշաբթի օրը՝ սեպտեմբերի 4-ին, բանավեճ անցկացնելու Քամալա Հարիսի հետ։ Բանավեճը տեղի կունենա Փենսիլվանիայում մի վայրում, որը դեռ որոշված ​​չէ», - գրել է նա։ 

Թրամփը պնդում է, որ միջոցառմանը հանդիսատեսներ կլինեն։ Նրանք ներկա չէին նախորդ բանավեճին, որին մասնակցում էր գործող նախագահ Ջո Բայդենը, ով այն ժամանակ դեռ չէր հրաժարվել վերընտրվելու համար պայքարից։