Արտաշատի համայնքապետին կոռուպցիայի կանխարգելման հանձնաժողովը տուգանել է. Հետք

Արտաշատի համայնքապետարանի շուրջ կոռուպցիոն աղմուկը չի մեղմվում։ Պարզվում է՝ Արտաշատ համայնքում շինարարական աշխատանքների ընթացքում կատարված առերևույթ հափշտակությունների և պաշտոնատար անձանց կողմից կաշառք ստանալու դեպքերի առնչությամբ քրեական վարույթից ավելի վաղ համայնքապետն արդեն իսկ հայտնվել էր կոռուպցիայի դեմ պայքարող մարմինների ուշադրության կենտրոնում, այս անգամ՝ կուսակցական և ընկերական հարաբերություններն են օգտագործվել պայմանագրերի կնքման համար։

Մասնավորապես, Կոռուպցիայի կանխարգելման հանձնաժողովը, հիմք ընդունելով «Hetq.am» լրատվականի՝ «Արտաշատի ավագանու անդամի ընկերությունը՝ նույն համայնքի սուբվենցիոն ծրագրերի հաղթող» վերտառությամբ հրապարակումը, ուսումնասիրություն է իրականացրել, որի արդյունքում պազվել է՝ ՀՀ Արարատի մարզի Արտաշատ համայնքի ղեկավար Կառլեն Սամվելի Մկրտչյանի հետ քաղաքական հարաբերություններով կապված անձ (Արտաշատ համայնքի ավագանու անդամ)՝ «Գարանտ Կապիտալ Ստրոյ» ՍՊԸ-ի 100 տոկոս բաժնեմասի սեփականատեր և տնօրեն հանդիսացող Նարեկ Բաղդասարյանի հետ իրականացված գնման գործընթացի արդյունքում 2023 թվականի նոյեմբերի 7-ին թիվ ԱՄԱՀ-ԲՄԱՇՁԲ-23/78 կապալային աշխատանքների կատարման պայմանագրի կնքմամբ Կառլեն Մկրտչյանն իր լիազորությունների շրջանակում կատարել է գործողություն (անգործություն), որն առերևույթ հանգեցրել է կամ կարող էր հանգեցնել շահերի բախման իրավիճակի առաջացման, մինչդեռ, որպես քաղաքական պաշտոն զբաղեցնող անձ այդ մասին «Հանրային ծառայության մասին» օրենքով սահմանված կարգով 10-օրյա ժամկետում գրավոր հայտարարություն չի ներկայացրել Հանձնաժողով, այդ կերպ թույլ տալով «Հանրային ծառայության մասին» օրենքի 33-րդ հոդվածի 7-րդ մասի պահանջի առերևույթ խախտում:

Հուլիսի 30-ին ԿԿՀ-ն որոշում է կայացրել՝ ՀՀ Արարատի մարզի Արտաշատ համայնքի ղեկավար Կառլեն Սամվելի Մկրտչյանի նկատմամբ կիրառել վարչական տույժ սահմանված նվազագույն աշխատավարձի երեքհարյուրապատիկի՝ 300 000 (երեք հարյուր հազար) ՀՀ դրամի չափով։

Հատկանշական է, որ հենց հուլիսի 30-ին էլ ՀԿԿ-ն օպերատիվ տվյալների հիման վրա՝ քրեական վարույթի շրջանակներում՝ գործողություններ են իրականացրել Արտաշատի համայնքապետարանում, ինչի արդյունքում վարույթի շրջանակում հանրային քրեական հետապնդում է հարուցվել 9 անձի նկատմամբ։ Նրանք մեղադրվում են առանձնապես խոշոր չափերի կաշառք ստանալու, կաշառք տալու, առանձնապես խոշոր չափերի խարդախություն կատարելու համար։ Այս պահին քրեական վարույթով վեց անձ է կալանքի տակ։