Հունաստանում անտառային հրդեհներ են. մարդիկ տարհանվում են (լուսանկարներ, տեսանյութ)

Խոշոր հրդեհ է մոլեգնում Աթենքից հյուսիս։ Ծխի ամպերը բարձրացել են և հասել Հունաստանի մայրաքաղաք, որը գտնվում է հրդեհից մոտ 30 կիլոմետր հարավ։ Հունական մի քանի գյուղեր ու քաղաքներ արդեն տարհանվել են։ Տեղի հարյուրավոր բնակիչներ հրշեջ մեքենայով և ոստիկաններով ապահով տեղ են ուղեկցվել, հաղորդում է հունական հեռուստատեսությունը։

Միաժամանակ, հեռուստատեսության լրագրողները հայտնել են, որ տեսել են տասնյակ այրվող տներ։ Որոշ վայրերում մարդիկ հրաժարվել են լքել իրենց տները՝ չնայած մոտեցող կրակին, և փորձել են փրկել իրենց ունեցվածքը:

«Բոցի բարձրությունը գերազանցում է 25 մետրը»,- AFP-ն մեջբերում է հունական ռադիոյին հրշեջ ծառայության ներկայացուցչի խոսքերը: Նրա խոսքով, նախորդ օրը մինչև մայրամուտ գործի է դրվել 29 հրշեջ ինքնաթիռ և ուղղաթիռ, իսկ հրդեհաշիջման աշխատանքներին ներգրավված են եղել մի քանի հարյուր հրշեջներ՝ 110 մեքենաներով, և բազմաթիվ կամավորներ։

Հաղորդվում է, որ զբոսաշրջային վայրերն ի սկզբանե վտանգի տակ չեն եղել: