Դատախազն ամեն ինչ անում է, որ գեներալին չազատեն. այս անգամ «վատացել» է դատարանում

Հրապարակը գրում է.

Գեներալ-մայոր, ԶՈՒ հետախուզության նախկին պետ Արայիկ Հարությունյանը, ով 2022 թվականի դեկտեմբերից կալանավորված է, անցած ամիս հայտարարությամբ հանդես եկավ, որ տևական ժամանակ է շինծու քրեական գործի շրջանակներում գտնվում է անազատության մեջ:

«Դատական քննության մեկ տարվա ընթացքում ես գրեթե հանդես չեմ եկել հրապարակային հայտարարություններով՝ հուսալով, որ ամեն դեպքում ընաթացող դատաքննությունը լույս կսփռի իրականության վրա։ Սակայն այն, ինչ տեղի է ունենում դատական նիստերի դահլիճում, ի ցույց է դնում, որ դատավարության շղարշի տակ ընթացող գործընթացի նպատակը մեկն է՝ ամեն գնով ինձ պահել անազատության մեջ եւ վերջում հաստատել ինձ ներկայացված անհիմն մեղադրանքը, որն արդեն իսկ ամբողջությամբ փլուզվել է դատարանում։ Ասվածի ապացույցն է այն, որ երկու անգամ առաջին ատյանի դատարանի երկու տարբեր դատարաններ փոփոխեցին իմ նկատմամբ կիրառված կալանավորումը եւ կիրառեցին այլընտրանքային խափանման միջոցներ, սակայն Վերաքննիչ քրեական դատարանը օրենքի կոպտագույն խախտումով կրկին ինձ կալանավորեց։

Գեղարքունիքի մարզի ընդհանուր իրավասությանն ինձ անազատության մեջ պահելը պայմանավորում է նրանով, որ մեղադրանքի կողմի վկաները դեռեւս չեն հարցաքննվել,սակայ հուլիսի 24-ի դատական նիստին,երբ ներկայացել էին վերջին երեք վկաները, հանրային մեղադրողը, պատճառաբանելով, թե պետք է մասնակցի ինչ-որ քննարկման, միջնորդեց հետաձգել դատական նիստը, իսկ դատարանը, առանց հաշվի առնելու, որ վկաները ներկայացել են դատարան, իսկ ինձ շարունակական կալանքի տակ պահելը պայմանավորված է միայն նրանց հարցաքննությամբ, ընդառաջ գնաց հանրային մեղադրողին եւ հետաձգեց դատական նիստը։ Այս ամենը այլ բան չի թողնում մտածելու, որ նման ապօրինություններն արվում են բացառապես ինձ անազատության մեջ պահելու համար», - նշել էր նա: 

Հիշեցնենք, որ Ա. Հարությունյանը մեղադրվում է նրանում, որ «որևէ միջոց չի ձեռնարկել հրամանի պահանջների կատարումն ապահովելու ուղղությամբ, ինչի հետևանքով ՀՀ զինված ուժերը զրկվել են ՀՀ–ի վրա անակնկալ հարձակմանը դիմակայելու հնարավորությունից»։ 

Ըստ դատախազության` «2021 թվականի մայիսի 12-ին Ադրբեջանի զինված ուժերի ստորաբաժանումները ՀՀ պետական սահմանի Գեղարքունիքի մարզի Վերին Շորժա, Կութ բնակավայրերին և Նորաբակ համայնքին հարող շփման գծի այն հատվածներով, որտեղ զորամասի հրամանատարի անգործության հետևանքով սահմանված չի եղել մարտական հերթապահություն, անարգել հատել և մխրճվել են ՀՀ պետական սահմանից ներս, տեղակայել մարտական դիրքեր՝ վերահսկողություն սահմանելով ՀՀ սուվերեն տարածքի նկատմամբ»։ 

Այսօր մենք տեղեկացանք, որ գեներալի դատական գործով բոլոր վկաներն արդեն հարցաքննվել են եւ դատարանը կարող է փոխել կալանքը, որովհետեւ այլեւ ամբաստանյալը չի կարող «ներազդել վկաների վրա»: Սակայն խափանման միջոցի քննությունը չի կայանում, քանի որ դատական նիստն արդեն երկրորդ անգամ է հետաձգվում է` դատախազ Գրիգոր Մղդեսյանի պատճառով: Առաջին դատական նիստի ընթացքում Մղդեսյանը հայտարարել է, որ շտապ հանդիպում ունի գլխավոր դատախազ Աննա Վարդապետյանի հետ, ուստի պետք է գնա, իսկ հաջորդ դատական նիստի ժամանակ` այսօր, դատախազ Մղդեսյանի առողջական վիճակը դատական նիստի ընթացքում իբրև կտրուկ վատթարացել է, դատարան է ժամանել Շտապօգնության ծառայությունը եւ դա պատճառ է դարձել, որ կրկին նիստը չկայանա: Դատաքննության մասնակիցների կարծիքով` սա ընդամենը էժանագին ներկայացում է եղել, որի նպատակն է ամեն գնով գեներալին անազատության մեջ պահելը, թեկուզ` էլի մի քանի օր: