Իսրայելի և ԱՄՆ-ի պաշտպանության նախարարները քննարկել են Գազայի հատվածի բանակցությունները

Իսրայելի և ԱՄՆ-ի պաշտպանության նախարարներ Յոավ Գալանտը և Լլոյդ Օսթինը հեռախոսով քննարկել են Գազայի հատվածի կարգավորման շուրջ բանակցությունների առաջընթացը և Իրանին համատեղ հակազդեցությունը։ Գրում է armtimes.com-ը։

Այս մասին հայտնել է Իսրայելի պաշտպանության նախարարության մամուլի ծառայությունը։

Հայտարարության համաձայն՝ զրույցի ընթացքում «Գալանտը նշել է Գազայում պահվող պատանդների ազատ արձակման շուրջ համաձայնության հասնելու համար շարունակական քննարկումների կարևորությունը» և «ընդգծել է, որ այդ համաձայնության ձեռքբերումը և՛ բարոյական հրամայական է, և՛ ռազմավարական անվտանգության առաջնահերթություն»:

Բացի այդ, Գալանտը և Օսթինը «քննարկել են Իսրայելի պաշտպանության և Իրանին ու նրա տարածաշրջանային արբանյակներին զսպելու համար շարունակական ներգրավվածությունը»: Այդ կապակցությամբ իսրայելցի նախարարը շնորհակալություն է հայտնել իր ամերիկացի գործընկերոջը՝ պաշտպանության ոլորտում երկու երկրների կապերն ամրապնդելու և տարածաշրջանում ամերիկյան ուժեր տեղակայելու համար։

Օգոստոսի 15-ին Դոհայում սկսվել է խորհրդակցությունների նոր փուլը՝ ուղղված Գազայի հատվածում հրադադարի հաստատմանը և պաղեստինյան ՀԱՄԱՍ շարժման պատանդներին ազատ արձակելուն։ Դրանք անցկացվում են իսրայելական պատվիրակության մասնակցությամբ՝ Եգիպտոսի, Կատարի և ԱՄՆ-ի միջնորդությամբ։

ՀԱՄԱՍ-ի ներկայացուցիչները բազմիցս հայտարարել են, որ իրենց պատվիրակությունը չի մասնակցելու Դոհայի բանակցություններին։ 

Բանակցություններն ընթանում են Մերձավոր Արևելքում լարվածության սրման նոր փուլի ֆոնին: