Վերջին մի քանի տարիների ընթացքում շուրջ 10 հազար հայեր են հեռացել Իրաքից

Հայ առաքելական եկեղեցու շուրջ 10 հազար հայեր են արտագաղթել Իրաքից վերջին մի քանի տարվա ընթացքում։ Այս մասին բաղդադյան «Աս–Սամարիա» հեռուստաալիքի հետ զրույցում հայտարարել է Հայ առաքելական եկեղեցու Իրաքյան թեմի առաջնորդ Մասիս Շահինյանը։ Հաղորդում է Regnum լրատվականը։

Նշելով, որ հայերը հնուց ի վեր բնակվել են ժամանակակից Իրաքի տարածքում, և ներկայումս մեծաթիվ հայ համայնքներ կան Բաղդադում, Մոսուլում, Կիրկուկում և Բասրայում, եպիսկոպոս Շահինյանը ասել է, որ 2003թ. հետո՝ անվտանգության և տնտեսական դժվարությունների հետ կապված խնդիրների պատճառով իրաքահայ համայնքի անդամների թիվը խիստ նվազել է։ Հոգևորականի խոսքերով, եթե 2003-ին հայերի թիվը Իրաքում 25 հազար էր, այսօր այդ թիվը հազիվ թե կազմի 15-16 հազար։

Հաշվի առնելով այն կարևոր հանգամանքը, որ Իրաքի իշխանությունները չեն կարողանում ապահովել խաղաղ բնակչության անվտանգությունը՝ հատկապես տեղի քրիստոնյաների՝ այդ թվում նաև հայերի տարրական անվտանգությունը, Իրաքում հայության թվի կրճատում սպասվում է նաև առաջիկա տարիներին։