Նասրալլայի մահից հետո Իրանի գերագույն և հոգևոր առաջնորդը տեղափոխվել է անվտանգ վայր. Reuters

Իրանի գերագույն առաջնորդ այաթոլլա Ալի Խամենեին տեղափոխվել է անվտանգ վայր երկրի ներսում, և նրա անվտանգությունն ուժեղացվել է, Reuters-ին հայտնել է այդ մասին տեղյակ երկու աղբյուրր:

Գործակալության զրուցակիցների խոսքով՝ Իրանի իշխանությունները մշտական կապի մեջ են «Հըզբոլլահի» և հարակից այլ խմբերի հետ՝ որոշելու, թե ինչ գործողություններ են ձեռնարկվելու Իսրայելի պաշտպանության բանակի կողմից «Հըզբոլլահի» առաջնորդ Հասան Նասրալլայի սպանությունից հետո։

Սեպտեմբերի 27-ի երեկոյան, այն բանից հետո, երբ Իսրայելը հարվածներ է հասցրել Բեյրութում «Հըզբոլլահ»-ի կենտրոնակայանին, Ալի Խամենեին, ինչպես գրում է The New York Times-ը՝ վկայակոչելով երկու իրանցի պաշտոնյաների, հրավիրել է Ազգային անվտանգության բարձրագույն խորհրդի արտակարգ նիստ։

Իսրայելի պաշտպանության բանակի մամուլի ծառայությունը սեպտեմբերի 28-ի առավոտյան հայտարարել էց, որ Հասան Նասրալլան, ով ղեկավարել է «Հըզբոլլահ»-ը ավելի քան 30 տարի, սպանվել է Բեյրութում շարժման կենտրոնակայանի վրա իսրայելական հարձակման հետևանքով։ «Հըզբոլլահ»-ը պաշտոնապես չի հաստատել Նասրալլայի մահը։

Հիշեցնենք՝ հուլիսի 31-ի գիշերը Թեհրանում սպանվել է ՀԱՄԱՍ-ի քաղբյուրոյի ղեկավար Իսմայիլ Հանիեն։ Նա Իրան էր մեկնել նոր նախագահ Մասուդ Փեզեշքիանի երդմնակալության արարողությանը։ Այն տանը, որտեղ հաստատվել էր Հանիեն, ռումբ էր պայթեցվել։

Իսրայելը պաշտոնապես չի ստանձնել ՀԱՄԱՍ-ի քաղբյուրոյի ղեկավարի սպանության պատասխանատվությունը, սակայն, ըստ ամերիկյան լրատվամիջոցների աղբյուրների, իսրայելցի պաշտոնյաները տեղեկացրել են ԱՄՆ իշխանություններին Հանիեի սպանությանը իրենց մասնակցության մասին։