Բաքվում դատում են ողջ հայ ժողովրդին. Սեյրան Օհանյան

Այսօր բռնապետական Բաքվում շարունակում է Արցախի Հանրապետության օրինական ընտրված ռազմաքաղաքական ղեկավարների դատավարությունը։

Այս մասին ԱԺ-ում ասաց «Հայաստան» խմբակցության ղեկավար Սեյրան Օհանյանը:

«Շինծու մի գործընթաց, որի հիմնական նպատակն է հռչակել Հայաստանը, հայ ժողովրդին որպես ագրեսոր և օկուպանտ, հիմքեր ստեղծել Հայաստանի դեմ նոր սադրանքների, նոր պատժամիջոցներ կիրառելու, նոր զիջումներ կորզելու համար։

Իսկ ովքե՞ր են դատավորները. ավտորիտար ու կոռումպացված, հազիվ դար ապրած մի պետություն, որը ջարդարարի ու ցեղասպանի վարքագիծ ունի։ Սումգայիթում ու Բաքվում ջարդեր, Արցախում ցեղասպանություն իրականացրած ռազմական հանցագործ և օկուպանտ ռեժիմն այսօր դատում է Արցախի ղեկավարներին, պաշտպանության բանակի հրամանատարների, ինքնապաշտպանական պայքարի մասնակիցների»,- հայտարարեց նա:

Օհանհանը նշեց՝ Ադրբեջանը, օգտվելով Հայաստանի իշխանությունների «կամազուրկ վարկից», կեղծելով պատմությունը, «ամեն օր նոր, ավելի ամոթալի վտանգավոր զիջումներ է կորզում»։

«Քաղաքական միջազգային ձևաչափերում Հայաստանը լուռ է, հակառակը՝ պատրաստակամ է վտանգներով հղի, ավելի խորացված կոնֆլիկտի հանգուցալուծման միակ մանդատ ունեցող ԵԱՀԿ Մինսկի խմբի լուծարմանը»,- հայտարարեց նա:

Պատգամավորը զորակցություն հայտնեց Ադրբեջանում ապօրինաբար պահվող հայ գերիներին և նշեց․ «Այսօր Բաքվի բանտում, ըստ էության, դատում ոտնահարում են հայ ժողովրդի արժանապատվությունը ազատ, անկախ ապրելու իրավունքը և ձգտումը»։