Ուրալում հայերի և կազակների միջև պատերազմ է հասունանում

Versia.ru կայքում այս վերնագրով զետեղված հոդվածում նշվում է, որ Ուրալում կազակները հայկական համայնքին մեղադրում են «իշխանության իրական լծակները բռնագրավելու և դրանք փոխելու», «շրջանի տնտեսական համակարգը զավթելու ու տեղական ինքնակառավարման մարմինները սեփական շահերին ծառայեցնելու» մեջ։

Ըստ հոդվածագիր Օլեգ Գորելովի՝ հայերն էլ «ետ չեն մնում» և պարբերաբար ոստիկանություն են դիմում՝ ասելով, որ կազակները հայերի զանգվածային կոտորած են իրականացնում։ «Երկու կողմերն էլ բողոքում են Ուրալի դաշնային շրջանում ՌԴ նախագահի լիազոր ներկայացուցչին, որը, սակայն, ակնհայտորեն «իրեն հեռու է պահում» այդ ամենից և իրավապահ մարմիններին «որևէ հուշում» չի անում»,– գրում է Գորելովը և ավելացնում, որ «մինչ իշխանությունն ու իրավապահ մարմինները ձևացնում են, թե որևէ արտառոց բան տեղի չի ունենում, կազակներն ու հայերը զինվում են. տեղական մամուլն արդեն հաշվել է զինանոցների մոտավոր տարողությունը և տագնապ է բարձրացնում, քանի որ պաշարները կարող են բավականացնել երկարատև զինված հակամարտության համար»։

Գորելովը նշում է, որ հայերի և կազակների միջև զանգվածային բախումները նախատեսված են հունվարի վերջին. «Կազակներն այս անգամ խոստանում են մեկընդմիշտ մաքրել հայրենի հողը «զավթիչներից», հայերն էլ իրենց հերթին պատրաստվում են այլ շրջաններից ազգականների ներգրավել։ Հունվարի 31–ը կազակները «ցասման օր են» հայտարարել։ Թե դա ինչ է նշանակում, չեն պարզաբանում, ասում են՝ ամեն ինչ ինքներդ կտեսնեք»։

«Այժմ կազակները «ցասման օրվան են» պատրաստվում, և իշխանությունները պետք է վերջնական որոշում կայացնեն։ Եվ եթե տեղի բնակչությունը զգա, որ նրանք «կողմնորոշվել են» ոչ իրենց օգտին, ապա հակամարտությունը միջէթնիկականից քաղաքականի կարող է վերածվել»,–նշում է հոդվածագիրը։