ԱՄՆ-ն շահագրգռվա՞ծ է տեսնել Տիգրան Սարգսյանին վարչապետի պաշտոնում

Տիգրան Սարգսյանի այցը Հարվարդի համալսարան և նրա դասախոսությունը միջազգային անվտանգության վերաբերյալ ակնհայտորեն պսակվեց հաջողությամբ: Սակայն, քչերն են ուշադրություն դարձրել, թե ինչ բնորորշմամբ է Հարվարդի համալսարանը հայտարարել միջոցառումը: Մեջբերում ենք հայտարարության տեքստից.

«Տիգրան Սարգսյանը ՀՀ վարչապետ է ընտրվել 2008-ին: Նա Հայաստանի կառավարող քաղաքական ուժի՝ Հանրապետական կուսակցության անդամ է: Տարածաշրջանային ուժերի պայքարում Հայաստանը փորձում է լուծել իր սեփական հիմնախնդիրները՝ առանց հակադրելու համագործակցությունը Ռուսաստանի, Եվրոպական Միության և ԱՄՆ-ի հետ: Որպես վարչապետ՝ Սարգսյանը հայտնի է որպես Հայաստանի տնտեսական բարեփոխումների և ժողովրդավարական վերափոխման շարունակական օրակարգի ջատագով՝ նպատակ ունենալով արդիականացնելու երկիրը և բարձրացնելու նրա համաշխարհային մրցունակությունը: Նա անձամբ ղեկավարում է մրցունակության, կրթության, գիտության, տեղեկատվական տեխնոլոգիաների և բիզնեսի բարեփոխումների խորհուրդների աշխատանքները:
Գաղտնիք չէ, որ նման ներկայացումը պատահական չէ: Հարվարդի համալսարանը ամերիկյան այն գիտական և ուսումնական կենտրոններից է, որտեղ կերտվում է ամերիկյան արտաքին քաղաքականության, համաշխարհային անվտանգության և ժողովրդավարության փիլիսոփայությունը:

Բոլորս էլ գիտենք, թե ժողովրդավարության ճանապարհին մեր երկրում ինչքան դեռ խոչընդոտներ կան, և բոլորս էլ հասկանում ենք, որ իրականացվող բարեփոխումները դեռ հեռու են մեզ բարեկեցիկ պետություն դարձնելուց: Հետևաբար, վարչապետի հասցեին շռնդացող այս ներբողները վկայում են ոչ այնքան իրական գնահատականի մասին, որքան ԱՄՆ-ի կողմից բացահայտ աջակցության մասին Հայաստանի ժողովրդավարական վերափոխման շարունակական օրակարգի:

Հարվարդից հետո վարչապետին ընդունեց ԱՄՆ փոխնախագահ Ջո Բայդենը: Չանդրադառնալով հանդիպման վայրի ընտրության ամերիկացիների ճաշակին, այն է Սպիտակ տունը, որտեղ երջանկահիշատակ Վազգեն Սարգսյանից հետո հայաստանյան և ոչ մի վարչապետ չի հյուրընկալվել, ինչպես նաև զուտ հանդիպման ժամանակի ու փաստի գործոններին, հաղորդագրության տեքստը շարադրվեց կրկին բարեփոխումների լույսի տակ. այսպես. «անդրադարձ կատարվեց ՀՀ Կառավարության կողմից իրականացվող բարեփոխումների ծրագրի ընթացքին»:

Կարելի է ենթադրել, որ ԱՄՆ-ը շահագրգռված է Տիգրան Սարգսյանի՝ վարչապետի պաշտոնում մնալով, քանի որ, անկախ ամեն ինչից, նա տնտեսական բարեփոխումների և ժողովրդավարական վերափոխման կողմնակից է, համենայն դեպս, ամերիկացիների համար:

Սրա տրամաբանական ակորդը «Հազարամյակների մարտահրավերներ կորպորացիա» ծրագրի գործադիր տնօրեն Դենիել Յոհաննեսի հետ հանդիպումն էր, որի արդյունքում, հնարավոր է, հաջորդ տարի բազմամիլիոնանոց ծրագիրը վերամեկնարկի Հայաստանում:

Թվում էր, թե ամերիկյան ծանր առօրյայից հետո վարչապետը պետք է բացառապես զբաղվեր ներհայաստանյան գործերով, բայց, արի ու տես, գալուց հետո անմիջապես՝ կապված Կոնեկտիկուտ նահանգում տեղի ունեցած սոսկալի ողբերգության հետ, Տիգրան Սարգսյանը ցավակցական հեռագիր է հղում իր նոր ընկերոջը՝ Բայդենին:

Եվ պատահակա՞ն է արդյոք այն, որ վարչապետն օրերս գրանցվեց Twitter միկրոբլոգում և առաջինը, ում հետևում է ցանցում, Զո Բայդենն է:

Կարծես թե խոստումնալից մեկնարկը տված է: Lավ կլիներ, սակայն, որ բոլոր հրապարակային և անդրկուլիսյան պայմանավորվածություններն ունենային հստակ և չափելի ազդեցություն մեր երկրի զարգացման, բարեկեցության բարձրացման և ժողովրդավարական վերափոխման գործում: