Ռուսաստանցի բնապահպան Գազարյանը քաղաքական ապաստան է խնդրում Էստոնիայից

Կրասնոդարցի բնապահպան հայազգի Սուրեն Գազարյանը, խուսափելով ռուսական իշխանությունների կողմից իրականացվող հետապնդումներից, Էստոնիայից քաղաքական ապաստան է խնդրել. հինգշաբթի օրը հայտնում է Риа Новости-ն՝ վկայակոչելով էստոնական ԶԼՄ-ներին:

Գազարյանն ինքը էստոնական լրատվամիջոցներին տված հարցազրույցում հաստատել է, որ քաղաքական ապաստան ստանալու համար իր միջնորդությունը նա երկու շաբաթ առաջ ներկայացրել է սահմանային անվտանգության և ոստիկանության քաղաքացիության ու միգրացիայի դեպարտամենտին: Դեպարտամենտում հրաժարվել են որևէ կերպ մեկնաբանել այդ տեղեկությունը՝ վկայակոչելով օրենքը, որն արգելում է քաղաքական ապաստան խնդրող մարդու մասին որևէ անձնական տեղեկություն հրապարակել:

ՌԴ ոստիկանությունը քրեական գործ է հարուցել հայտնի կրասնոդարցի բնապահպան Սուրեն Գազարյանի նկատմամբ՝ մահվան սպառնալիք ներկայացնելու մեղադրանով: Գազարյանը հերքում է մեղադրանքը: Նրա խոսքերով՝ 2012թ. օգոստոսի 2-ին ինքը կոնֆլիկտ է ունեցել մասնավոր սեփականություն հանդիսացող օբյեկտներից մեկի պահակի հետ, որից հետո նա ոստիկանություն է դիմել և հայտնել, թե Գազարյանը սպառնացել է սպանել իրեն:

Դեկտեմբերի 21-ին ռուսական իշխանություննեը հայտարարել էին, որ Գազարյանի նկատմամբ հարուցված քրեական գործը կարճվել է նրա նկատմամբ հետախուզություն հայտարարելու պատճառով: