Ստամբուլում դանակի 7 հարվածով ծեր հայուհու են սպանել

Ստամբուլի Ֆաթիհ թաղամասում երեկ երեկոյան դանակի 7 հարվածով սպանվել է մի տարեց հայուհի: Նրան հայտնաբերել են մահացած իր սեփականտանը՝ կոկորդի վրա առկա դանակի կտրվածքներով. գրում է Son Dakika թուրքական գործակալությունը:

84-ամյա հայ կինը միայնակ էր բնակվում իր տանը: Նրա որդին՝ Զադիկ Քյուչուկը, այդ օրը աշխատանքից հետո այցելել է իր մորը՝ Մարիսա Քյուչուկին: Երբ կինը դուռը չի բացել, տղան սեփական բանալիով բացել է դուռը և հայտնաբերել մորը կոկորդը կտրված և մահացած վիճակում:

Դեպքի վայր ժամանած բժշկական խումբը կնոջ մարմնի վրա հայտնաբերել է դանակի 7 հարված:

Վերջին անգամ կնոջը տեսել էին հարևանները ցերեկը ժամը 15:30-ի սահմաններում, երբ կինը խանութից վերադառնում էր տուն՝ կատարած գնումների տոպրակը ձեռքին:

Այժմ Ստամբուլի ոստիկանությունը որոնում է ազգությամբ հայ, 4 երեխաների մայր հանդիսացող կնոջ մարդասպանին: