Հայտնի են ՌԴ-ում վթարից զոհված 4 հայերի անունները

Ինչպես արդեն Lurer.com-ը տեղեկացրել էր, ս/թ. հունվարի 6-ին Պերմ-Եկատերինբուրգ մայրուղու 64-րդ կմ-ին իրար են բախվել «Hyundai Accent» և «ՎԱԶ-2110» մակնիշի ավտոմեքենաները: Տեղի ունեցած ավտովթարի պատճառով կան զոհվածներ և վիրավորներ:

Ըստ ՌԴ-ում ՀՀ դեսպանության ճշտած տվյալների՝ «ՎԱԶ-2110» մակնիշի ավտոմեքենայի մեջ եղել է 5 ՀՀ քաղաքացի, որոնցից 4-ը՝ Մկրտչյան Դավիթ Նորայրի (ծնվ.՝ 1977թ.), Արևշատյան Աշխեն Մայիսի (ծնվ.՝ 1991թ.), Արևշատյան Սուսաննա Կարենի (ծնվ.՝ 1958թ.) և Արևշատյան Մայիս Լյուդվիկի (ծնված՝ 1954), տեղում մահացել են: Ուղևորներից Արևշատյան Լիանա Մայիսին (ծնված՝ 1978թ.) տարբեր կարգի կոտրվածքներով տեղափոխվել է Կունգուր քաղաքի հիվանդանոց:

Ինչպես հաղորդում են Ռուսաստանի ՆԳՆ գլխավոր վարչության Պերմի մարզի ճանապարհային ոստիկանությունից, ավտովթարի մեղավորը եղել է «Hyundai»-ի վարորդը, ով ևս տեղում մահացել է: Մայրուղու վրա նա փորձել է շրջանցել «ՄԱԶ» մեծ բեռնատարը, արդյունքում հայտնվել է հանդիպակած գոտում և ճակատային մասով հարվածել «ՎԱԶ 2110»-ին: