Ֆրանսահայերը պահանջում են հաստատել օրինագիծը

Ֆրանսահայ հայտնի մտավորականները, Շառլ Ազնավուրի գլխավորությամբ, կոչ են արել Ֆրանսիայի Սենատին հաստատել Հայոց ցեղասպանության ժխտումը քրեականացնող օրինագիծը: 

Նրանք կոչում նշել են, որ իրենց և Եղեռնի զոհերին վիրավորում է Ցեղասպանության ժխտումը, հատկապես որ վերջիններս այլևս չեն կարող իրենց պաշտպանել: «Ժխտումը ցույց է տալիս, որ այն ֆանատիզմը, որի պատճառով Թուրքիայում զանգվածային կերպով բնաջնջվեցին հայերը, դեռ կա և հետապնդում է մեզ անգամ Ֆրանսիայում, ուր ապաստանել են մեր ծնողներն ու տատերն ու պապերը»,–ասված է մտավորականների կոչում։

Նրանց վրդովեցրել է նաև այն, որ Ֆրանսիայի հանդեպ փորձում են ճնշումներ իրականացնել ռասիզմի և խտրականության դեմ ուղղված որոշման համար։

Ֆրանսիական մշակույթի զարգացմանն ու տարածմանը նպաստող արվեստագետները կոչ են արել քաղաքական ուժերին, ովքեր կողմ են արտահայտվել օրինագծին, հաստատուն մնալ իրենց տեսակետներին և նպաստել, որ այն Սենատում ևս հաստատվի։

Կոչը ստորագրել են այնպիսի հայտնի անձինք, ինչպիսիք են դերասաններ Սիմոն Աբգարյան, Պասկալ Լեժիտիմոն ու Սերժ Ավետիքյանը, գրող Սոֆի Ֆոնտանելը, պրոդյուսերներ Լևոն Սայանն ու Ալեն Թերզյանը, երգիչներ Էլեն Սեգարան, Ֆրեդերիկ Նևչեիրլյանն ու Վինսենթ Բագույանը, երաժիշտ Անդրե Մանուկյանը և այլոք…

Իսկ Ֆրանսիայի հայկական կազմակերպությունների համակարգող խորհուրդը պատրաստվում է հանրահավաք անցկացնել Սենատում օրինագծի քննարկմանն ընդառաջ։ Հանրահավաքի մասնակիցները Սենատի դիմաց կսպասեն որոշման կայացմանը։