Թրամփը նշել է Չինաստանի նկատմամբ առևտրային քաղաքականության մեղմացման պայմանը

ԱՄՆ նախագահ Դոնալդ Թրամփը հայտարարել է, որ Վաշինգտոնը կարող է մեղմացնել չինական ապրանքների ներմուծման մաքսատուրքերը՝ պայմանով, որ Պեկինը փոխի իր մոտեցումը հազվագյուտ մետաղների արտահանման նկատմամբ և վերականգնի ամերիկյան սոյայի նախկին գնման ծավալները, հաղորդում է ՏԱՍՍ-ը։

Ամերիկացի առաջնորդի խոսքով՝ դա կենթադրի մի քանի հիմնական հազվագյուտ մետաղների, այդ թվում՝ սամարիումի, գադոլինիումի, տերբիումի, դիսպրոզիումի, լյուտեցիումի, սկանդիումի և իտրիումի արտահանման վերահսկողության վերացում։ Նա ընդգծել է, որ Միացյալ Նահանգները Չինաստանից «փոխադարձ քայլեր» է սպասում, քանի որ Վաշինգտոնը գոհ չէ Պեկինի ներկայիս քաղաքականությունից։

Թրամփը նշել է, որ նման մետաղների մատակարարումների սահմանափակումը կարող է վնասել համաշխարհային տնտեսության հիմնական ոլորտներին և ընդգծել է, որ Միացյալ Նահանգները մտադիր չէ թույլ տալ ռազմավարական նշանակություն ունեցող նյութերի արտահանման մանիպուլյացիաներ։