Մասկի- շոուների փոխարեն՝ ԱԱԾ-ն իր վետերաններին պիտի հարգի, ոչ թե Եպիսկոպոսյանի հոգեհանգստին օպերատիվ նկարահանում անի. Գեղամ Մանուկյան

Օրերս հրաժեշտ տվեցինք Ազգային անվտանգության համակարգի երկարամյա աշխատակից, ԱԱԾ տնօրենի տեղակալ, բազմաթիվ պաշտոններ զբաղեցրած, գեներալ-լեյտենանտ Հրանտ Եպիսկոպոսյանին, պետք է արձանագրեմ, որ հակառակ զինվորական այդ բարձր կոչմանը, հակառակ իր ծառայությանը, ԱԱԾ ներկայիս ղեկավարության կողմից որևէ կերպ պաշտոնական որևէ հաղորդագրություն չեղավ, որևէ հարգանքի տուրք մատուցելու արարողակարգեր չեղավ, ինչն ընդհանրապես ընդունված է զինվորական բարձրաստիճան անձանց հանգստի ճանապարհելու ժամանակ։ Այս մասին ԱԺ պաշտպանության և անվտանգության հարցերի միշտական հանձնաժողովի նիստում ասաց «Հայաստան» խմբակցության պատգամավոր Գեղամ Մանուկյանը։ 

«Պետք է ցավով արձանագրեմ, որ հոգեհանգստյան արարողության ժամանակ զարհուրեցի օպերատիվ այն նկարահանումից, որը թերևս ԱԱԾ ներկայիս ղեկավարությունը փորձում էր իրականացնել՝ ֆիքսելու, թե ովքեր են եկել հարգանքի տուրք մատուցել բազմաթիվ սերունդներ դաստիարակած նաև գեներալ- լեյտենանտ պարոն Եպիսկոպոսյանին։ ԱԱԾ-ն նաև իր վետերաններին պետք է հարգի, և այդ հարգանքի հիման վրա է, որ ձևավորվում է իրոք արհեստավարժ համակարգ, իրոք սպայական պատիվ, և փոխանակ մասկի շոուների, ամենօրյա քաղաքական նպատակով գաղտնալսումների, սլեշկաների փոխարեն կարող էր ԱԱԾ-ն ներկայիս ղեկավարությունը իր պարտականությունները կատարել»,-ասաց Մանուկյանը: