Թոշակառուն կեղծ Բրեդ Փիթին խոշոր գումար է փոխանցել

Պատրիսիա անունով շվեյցարացի թոշակառուը դարձել է խաբեբայի զոհ, որը ներկայացել էր որպես Հոլիվուդյան աստղ Բրեդ Փիթ, գրում է Daily Mail-ը։

Պատրիսիան ասել է, որ կեղծ Բրեդ Փիթի հետ նամակագրություն է սկսել 2024 թվականի մայիսին։ Նա հետևել է դերասանի պաշտոնական Instagram-յան էջին և շուտով հաղորդագրություն է ստացել հոլիվուդյան աստղի ենթադրյալ մենեջերից։ Նա առաջարկել է անձամբ հանդիպել նրա հետ։ Պատրիսիան համաձայնվել է։

Ըստ թոշակառուի՝ «Բրեդ Փիթի» հետ իր նամակագրությունը շուտով ավելի ռոմանտիկ է դարձել։ Խաբեբան հետաքրքրվել է կնոջ կյանքով և հստակեցրել, որ սիրահարված է իրեն։

Անձնական հանդիպման մասին քննարկման ժամանակ կեղծ Բրեդ Փիթը պնդել է, որ իր ղեկավարությունը մեծ գումար է պահանջել իրենց հանդիպման համար։ Պատրիսիան հավատացել է նրան և ուղարկել գումարը։ Այնուհետև գումար փոխանցելու խնդրանքները շատացել են։ Ընդհանուր առմամբ, կինը վճարել է ավելի քան 90,000 ֆունտ ստեռլինգ։

Ավելի ուշ «Բրեդ Փիթը» Պատրիսիային հրավիրել է հանդիպելու Միացյալ Նահանգներում։ Նա հավաքել է իր ճամպրուկները և ուղևորվել Լոս Անջելես։ Սակայն, ի վերջո, նա երեք շաբաթ մենակ է անցկացրել հյուրանոցում։ Չհանդիպելով «Փիթին՝ նա վերադարձել է Շվեյցարիա, որտեղ պատահաբար հանդիպել է նմանատիպ խարդախության, որի զոհ է դարձել մի ֆրանսիացի կին։ Այդ ժամանակ էլ թոշակառուն հասկացել է, որ իրեն խաբել են։

Պատրիսիան ոստիկանություն հաղորդում է ներկայացրել։ Նա խոստովանել է, որ աննկարագրելիորեն ամաչում է այն բանից, թե ինչպես են խաբել իրեն։