Ուկրաինա զորք ուղարկելու հարցը պետք է լուծել հրադադարից հետո. Թուրքիա

Թուրքիայի պաշտպանության նախարարությունը հայտարարել է, որ հնարավոր զորախմբի ուղարկումը Ուկրաինա պետք է քննարկել միայն այն դեպքում, երբ Ռուսաստան–Ուկրաինա միջև հաստատվի կայուն հրադադար։ Այս մասին հայտնում է TRT-ն՝ վկայակոչելով նախարարության աղբյուրին։

Աղբյուրը նշել է, որ ցանկացած միջազգային միսիա պետք է հստակ ձևակերպված առաքելություն ունենա՝ սահմանված նպատակներով և յուրաքանչյուր երկրի մասնակցության չափով։ Նրա խոսքով՝ Թուրքիայի զինված ուժերը պատրաստ են աջակցել ցանկացած նախաձեռնության, որը կնպաստի տարածաշրջանի անվտանգությանը և կայունությանը։

Մինչ այդ Մեծ Բրիտանիան հաստատել էր իր զորքերը Ուկրաինա ուղարկելու նախնական պլանը՝ ընդգծելով, որ այն կկարգավորվի «կամավորների կոալիցիայի» մյուս երկրների հետ և կհամապատասխանի Կիևի պահանջներին։