Շտապում եմ Երևան, շուտով կհայտնեմ իմ տեսակետը. Վայոց ձորի թեմի առաջնորդ (տեսանյութ)

Վայոց Ձորի թեմի առաջնորդ Տ. Աբրահամ արքեպիսկոպոս Մկրտչյանը չի միացել Ամենայն Հայոց Կաթողիկոս Գարեգին Երկրորդի և Մայր Աթոռ Սուրբ Էջմիածնի դիվանապետ Գերաշնորհ Տեր Արշակ արքեպիսկոպոս Խաչատրյանի դեմ Հայ Առաքելական եկեղեցու մի խումբ բարձրաստիճան եկեղեցականների ստորագրահավաքին, քանի որ այնտեղ չի եղել։

«Բայց հիմա շտապում եմ Երևան ու քիչ հետո հայտնի կլինի իմ տեսակետը»,– Euromedia24-ի հետ զրույցում ասաց Տեր Աբրահամ արքեպիսկոպոսը։ Հարցրին` շտապո՞ւմ է Նիկոլ Փաշինյանի հետ հանդիպմանը, որն այսօր լրագրողների հետ զրույցում հայտարարեց, թե մտադիր է հանդիպել այն եպիսկոպոսների հետ, ովքեր միացել են Կաթողիկոսի դեմ հայտարարությանը՝ հետագա զարգացումները քննարկելու համար, Տ Աբրահամ Մկրտչյանը խուսափեց պատասխանել, միայն կրկնեց․ «Գալիս եմ Երեւան ու քիչ հետո կլսեք իմ տեսակետի մասին»։

Հիշեցնենք, որ այսօր մերձիշխանական ԶԼՄ–ները տարածել են 13 եպիսկոպոսներին վերագրվող նամակ, ըստ որի՝ նոյեմբերի 5-ին Մայր աթոռում ստեղծվել է հանձնախումբ Արշակ արքեպիսկոպոս Խաչատրյանին վերագրվող աղմկահարույց տեսանյութերի փորձագիտական եզրակացություն իրականացնելու համար։

Ըստ հայտարարության, իբր, նոյեմբերի 25-ին ՔԿ-ն տրամադրել է եզրակացություն, որով հաստատվել է տեսանյութերի իսկությունը, սակայն Ամենայն հայոց կաթողիկոսն «առ ոչինչ» է համարել այն ու, իբրև թե եպիսկոպոսները դատապարտում են կաթողիկոսի որոշումը և «պահանջում վերականգնել Հայ առաքելական եկեղեցու սուրբ անունը»։ Հայտարարության վերջում 13 եպիսկոպոսների անուններ են և նրանցից 9-ի ստորագրությունները։

Ավելի ուշ Արշակ արքեպիսկոպոս Խաչատրյանի պաշտպան Արսեն Բաբայանը հայտարարեց, որ ողջամտորեն չէր կարող նշանակվել և չէր կարող կատարվել Արշակ Սրբազանին վերագրվող տեսանյութերի փորձաքննություն, «իսկ եթե կատարվել էր, ապա այն չէր կարող տրամադրվել այլ անձանց նախաքննության գաղտնիության պահանջներից ելնելով»։