Թուրքիայում շանունակվում են լրագրողների ձերբակալությունները

Թուրքիայում հայտնիների դեմ սկսված թմրանյութերի հետաքննության շրջանակներում դեկտեմբերի 9-ի գիշերը Ստամբուլում ձերբակալվել է Habertürk հեռուստաալիքի գլխավոր խմբագիր Մեհմեթ Ակիֆ Էրսոյը։ Նա ազատվել է պաշտոնից Թուրքիայի խնայողական ապահովագրության հիմնադրամի կողմից, որը կառավարում է հեռուստաալիքը։

Ստամբուլի դատախազությունը հայտարարել է, որ Էրսոյին և ևս 7 անձի մեղադրանք է առաջադրվել թմրամիջոցներ կամ խթանիչներ ձեռք բերելու, պահելու և օգտագործելու համար։

Դրանից բացի, տեղական լրատվամիջոցները հայտնել են Habertürk միջազգային լրատվական տնօրեն Էլիֆ Քըլըչի, ինչպես նաև աշխատակիցների՝ Ուֆուկ Թեթիքի, Մահմութ Գյոդեի, Մուստաֆա Մանազի, Գիզեմ Այբաքթիի, Էբրու Գյուլանի և Բուսե Օզտայինի ձերբակալության մասին։

Նախկինում՝ դեկտեմբերի 5-ին, նույն հետաքննության շրջանակներում ձերբակալվել էին հեռուստահաղորդավարներ Էլա Ռումեյսա Ջեբեջին (Show TV), Մելթեմ Աչեթը (նախկինում՝ Habertürk) և Հանդե Սարիօղլուն (Beyaz TV): Ցուցմունքներ տալուց, թմրամիջոցների թեստ հանձնելուց և հեռախոսները բռնագրավելուց հետո հաղորդավարներն ազատ են արձակվել: