Ռուսաստանից Հնդկաստան հում նավթի ներմուծումը կհասնի վեցամսյա առավելագույնի․ Reuters

Հնդկաստանի ռուսական հում նավթի ներմուծումը դեկտեմբերին կհասնի վեցամսյա առավելագույնի, և մատակարարումները, կանխատեսումների համաձայն, կաճեն մինչև օրական 1,85 միլիոն բարել՝ նոյեմբերի 1,83 միլիոն բարելի համեմատ, հաղորդում է Reuters-ը՝ հղում անելով Kpler-ի վերլուծաբանների կանխատեսմանը։

Այս տարվա հունիսին Հնդկաստանում ռուսական հում նավթի ներմուծումը հասել է իր ամենաբարձր մակարդակին՝ օրական 2,10 միլիոն բարելի։

Դեկտեմբերին ժամանող ռուսական հում նավթի մեծ մասը բեռնաթափվում է Հնդկաստանի Վադինար նավահանգստում։ Kpler-ի տվյալներով՝ առաքումները, կանխատեսումների համաձայն, կհասնեն օրական մոտավորապես 658,000 բարելի (նոյեմբերի օրական 561,000 բարելի համեմատ)։ Այս նավահանգիստը սպասարկում է Nayara Energy-ի նավթավերամշակման գործարանը, որն ունի օրական 405,000 բարել վերամշակման հզորություն, ինչը ցույց է տալիս, որ ներկայիս ռուսական ներմուծումը զգալիորեն գերազանցում է դրա հզորությունը։