Որտեղի՞ց է Հայաստանը հացահատիկ ներկրում. 10 ամսվա ամփոփում

Ռուսաստանը շարունակում է առաջատարի դիրքում մնալ, սակայն Հայաստան հացահատիկ է ներկրվում նաև հետխորհրդային այլ երկրներից։

Հայաստանը 2025 թվականին հացահատիկ է գնել ոչ միայն Ռուսաստանից, այլև նախկին հետխորհրդային տարածքի այլ երկրներից և ԵՄ-ից։ Այս մասին են վկայում ՀՀ էկոնոմիկայի նախարարության տվյալները, որը գերատեսչությունը ներկայացրել է` պատասխանելով Sputnik Արմենիայի գրավոր հարցմանը։

Ռուսաստանը շարունակում է առաջատարի դիրքում մնալ. 2025 թվականի հունվար-հոկտեմբեր ամիսներին ՌԴ–ից հայկական շուկա է մատակարարվել ընդհանուր ծավալի 99,8%-ը (366,4 հազար տոննա)։ Հացահատիկի մնացած 0,2%-ը (1731,23 տոննա) ներկրվում է այլ երկրներից։ Ցորեն (1195,6 տոննա) ներկրվել է նաև Ղազախստանից, Բելառուսից և Ավստրիայից, գարի՝ (1,93 տոննա) Ավստրիայից, Գերմանիայից և Իտալիայից, եգիպտացորեն՝ (533,7 տոննա) Վրաստանից, Ղազախստանից, Ուկրաինայից, Ֆրանսիայից և Ավստրիայից: