Փաշինյանի հայտարարությունը նշանակում է Հայ Առաքելական եկեղեցու դեմ գրոհի հրավիրել արտաքին մի շարք ուժերի. Բադալյան

«Նիկոլ Փաշինյանը Գերմանիայում արել է մեկ այլ վտանգավոր հայտարարություն, կապված այն հանգամանքի հետ, թե՝ «ոչ մեկը չգիտե, թե ինչպես է ֆինանսավորվում Հայ Առաքելական եկեղեցին, որտեղից են գալիս, ինչպես են ծախսվում փողերը»»,- նշել է քաղաքական մեկնաբան Հակոբ Բադալյանը։

Հիշեցնենք, որ Գերմանիայում՝ Արտաքին հարաբերությունների գերմանական ընկերակցությունում պատասխանելով ներկաներից մեկին հարցին՝ Փաշինյանն ասել էր. «Մենք ընդամենն ուզում ենք եկեղեցու և հոգևորականների համապատասխանություն  եկեղեցու կանոններին, հաշվետվողականություն։ Ոչ ոք չգիտի, թե մեր եկեղեցին ինչպես է ֆինանսավորվում, ինչ գումար է մուտք լինում, ինչպես է այն ծախվում»։ 

Բադալյանը գրել է. «Եթե վաղը Ադրբեջանից օրինակ որևէ մեկը Հայ Առաքելական եկեղեցուն սկսի մեղադրել ինչ որ ֆինանսական մեքենայությունների կամ հանցավոր մեխանիզմների համար, պետք չէ զարմանալ՝ «փոխանցումը» կատարել է Հայաստանի վարչապետը:

Այսպիսի հայտարարությունները վկայում են, որ Նիկոլ Փաշինյանը գործնականում այս հարցում չունի որևէ «կարմիր գիծ»:

Եվ սա այն պարագայում, որ Հայ Առաքելական եկեղեցու ֆինանսները գուցե չեն ենթարկվում հանրային հաշվետվողության, բայց պետությունն իր հատուկ ծառայություններով անկասկած ի զորու է լիովին տիրապետել պատկերին: Այո, գուցե հանրային թափանցիկության կամ հաշվետվողականության հարցում կարող է լինել մեխանիզմների վերանայման խնդիր: Կրկնեմ՝ գուցե, որովհետև ինքս համարում եմ, որ զուտ հանրային թափանցիկության իմաստով եկեղեցու ֆինանսական կենսագործունեության «պատսպարվածությունը» բխում է այն բավականին բարդ խնդիրներից, որ լուծում  աշխարհասփյուռ ՀԱԵ-ն:

Բայց, որևէ պարագայում, բարձրաձայնել հրապարակավ, թե ոչ մեկը չգիտե՝ որտեղից է գալիս փողը և ուր է գնում, նշանակում է Հայ Առաքելական եկեղեցու դեմ գրոհի հրավիրել արտաքին մի շարք ուժերի, այդ թվում տալ նոր գրոհների նպաստավոր պայմաններ նրանց, որոնք արդեն իսկ զբաղված են այդ գործով»։