Զելենսկին պատմել է, թե ինչու է Բելառուսը ազատված քաղաքական բանտարկյալներին փոխանցել հենց Ուկրաինային

Ուկրաինայի նախագահ Վլադիմիր Զելենսկին, Բեռլին մեկնելու ճանապարհին, լրագրողների հետ առցանց զրույցի ընթացքում պատմել է, որ Բելառուսը չի ցանկացել ազատել քաղաքական բանտարկյալներին որևէ ԵՄ երկրի միջոցով, այդ պատճառով նրանք տեղափոխվել են Ուկրաինա, հայտնում է «Европейская правда»-ն։

Ըստ նրա, երկրների միջև շփումները Բելառուսի քաղաքական բանտարկյալների հարցով տեղի են ունեցել հետախուզական կառույցների մակարդակով։

«Այնուհետև Պետական հետախուզական վարչության ղեկավար Կիրիլ Բուդանովը դիմեց ինձ՝ ասելով, որ բելառուսները պատրաստ են հանձնել քաղաքական բանտարկյալներին, բայց չեն ուզում դա անել այս կամ այն ԵՄ երկրի միջոցով, բայց եթե ես աջակցեմ, պատրաստ են փոխանցել Ուկրաինայի միջոցով։ Ես ասացի․ «Անշուշտ, աջակցում ենք, պատրաստ ենք ընդունել»», — պատմել է Զելենսկին։

Ըստ նրա, քաղաքական բանտարկյալների հարցը կարևոր է Ուկրաինայի համար, քանի որ նրանց մեջ նաև ուկրաինացիներ կան։
«Անշուշտ պետք է վերցնել և՛ մեր, և՛ բելառուսական քաղաքական բանտարկյալներին։ Եվ հենց այս կերպ է մեզ մոտ ընդունվում որոշումը», — նշել է Ուկրաինայի նախագահը։

Հիշեցնենք, որ երեկ՝ դեկտեմբերի 13-ին, Բելառուսի նախագահ Ալեքսանդր Լուկաշենկոն ԱՄՆ-ի հետ բանակցությունների արդյունքում ազատ է արձակել 123 քաղաքական բանտարկյալի։

Հետագայում հայտնի դարձավ, որ ազատվածների մեծ մասը փոխանցվել է Ուկրաինային։