Երեխայի ծննդյան միանվագ նպաստի չափի համահարթեցմանը միտված օրենսդրական նախաձեռնություն

Նախագծի ընդունման անհրաժեշտությունը 2026 թվականի հունվարի 1-ին և դրանից հետո ընտանիքում ծնված երրորդ և յուրաքանչյուր հաջորդ երեխայի համար 50000 դրամ աջակցություն նշանակելու ու վճարելու շարունակականությունն ապահովելն է, երեխայի ծննդյան միանվագ նպաստի չափի համահարթեցումը և իրավակիրառ պրակտիկայում ծագած խնդիրների լուծումը: Կառավարության հեղինակած ««Պետական նպաստների մասին» օրենքում փոփոխություններ և լրացումներ կատարելու մասին» և ««Պետական կենսաթոշակների մասին» օրենքում փոփոխություններ կատարելու մասին» օրենքների նախագծերի փաթեթն առաջին ընթերցմամբ քննարկվել է ՀՀ ԱԺ աշխատանքի և սոցիալական հարցերի մշտական հանձնաժողովի՝ դեկտեմբերի 15-ի արտահերթ նիստում:

ՀՀ աշխատանքի և սոցիալական հարցերի նախարարի տեղակալ Դավիթ Խաչատրյանի ներկայացմամբ՝ մշտադիտարկումներից ու վերլուծություններից ակնհայտ է, որ համակարգում իրականացվող բարեփոխումներից էական, դրական արդյունքներ են արձանագրվել:

Մանրամասն ներկայացնելով նախագծերի փաթեթով նախատեսվող իրավական կարգավորումները՝ հիմնական զեկուցողն առաջարկել է կողմ քվեարկել օրենսդրական նախաձեռնությանը: Նա հայտնել է, որ հունվարի 1-ից սկսած Կառավարությունը կհաստատի կենսաթոշակների և նպաստների վճարման նոր կարգ, համաձայն որի՝ 2026 թվականի ապրիլի 1-ից բոլոր վճարումները կիրականացվեն անկանխիկ եղանակով:

Դավիթ Խաչատրյանը պատասխանել է պատգամավորների հարցերին՝ ներկայացնելով պարզաբանումներ նախատեսվող կարգավորումների վերաբերյալ:

Ելույթներում պատգամավորները կարևորել են առաջարկվող փոփոխությունները:

Լրամշակված նախագիծը ստացել է դրական եզրակացություն: Այն կքննարկվի դեկտեմբերի 16-ին գումարվող Ազգային ժողովի արտահերթ նիստում:

Հանձնաժողովը կողմ է քվեարկել օրենքների նախագծերի փաթեթը 24-ժամյա ռեժիմով քննարկելու Կառավարության առաջարկին: