ԱԽ քարտուղարը կարևորել է խաղաղության գործընթացի ինստիտուցիոնալացումը

ՀՀ անվտանգության խորհրդի (ԱԽ) քարտուղար Արմեն Գրիգորյանը հանդիպեց ԵՊՀ ուսանողների հետ՝ անդրադառնալով տարածաշրջանային և աշխարհաքաղաքական զարգացումներին, ինչպես նաև պատասխանեց ուսանողներին հետաքրքրող հարցերին։ Այս մասին հայտնում են Երևանի պետական համալսարանից։

ԵՊՀ ռեկտոր Հովհաննես Հովհաննիսյանն ընդգծեց, որ ուսանողների նախաձեռնությամբ կազմակերպված այս հանդիպումը, ինչպես նաև նմանօրինակ այլ միջոցառումները կարևոր քայլ են ՀՀ պաշտոնյաների և ուսանողների անմիջական հաղորդակցությունը խթանելու գործում։ Նրա խոսքով՝ ՀՀ անվտանգության խորհրդի քարտուղարի հետ այս հանդիպումը կնպաստի հավաստի տեղեկություն ստանալուն, իսկ քաղաքական տեսանկյունից օգտակար կլինի Միջազգային հարաբերությունների ֆակուլտետի ուսանողների համար: ԱԽ քարտուղարը խոսեց օգոստոսի 8-ից հետո Հարավային Կովկասում հաստատված խաղաղության մասին և կարևորեց խաղաղության գործընթացի ինստիտուցիոնալացումը՝ ընդգծելով տարածաշրջանային կապուղիների ապաշրջափակման ուղղությամբ իրականացվող աշխատանքները։

Այս համատեքստում ընդգծեց նաև «Թրամփի ուղի՝ հանուն միջազգային խաղաղության և բարգավաճման» հաղորդակցության ծրագրի շրջանակում ձեռնարկվող քայլերը և ընձեռվող տնտեսական հնարավորությունները: Ուսանողները հետաքրքրվեցին նաև Հայաստանի ու տարածաշրջանի երկրների հարաբերություններից, որի ընթացքում ևս ծավալվեց բովանդակալից քննարկում: