TRIPP-ը նույն «Զանգեզուրի միջանցքը» չէ. Ռուբինյան

«TRIPP-ը նույն «Զանգեզուրի միջանցքը» չէ, TRIPP –ը բիզնես նախագիծ է, որը գործելու է Հայաստանի ինքնիշխանության, տարածքային ամբողջականության իրավազորության ներքո, հավասարության սկզբունքներով»,- լրագրողների հետ զրույցում ասաց ԱԺ փոխխոսնակ Ռուբեն Ռուբինյանը՝ անդրադառնալով Իրանի հոգևոր առաջնորդի՝ միջազգային հարցերով խորհրդական Ալի Աքբար Վելայաթիի այն հայտարարությանը թե «Թրամփի այսպես կոչված կովկասյան ծրագիրը ոչնչով չի տարբերվում «Զանգեզուրի միջանցքից», և Իսլամական Հանրապետությունը կտրականապես դեմ է դրան»։

Նա նշեց, որ իրենք իրանցի գործընկերների հետ մշտապես կապի մեջ են, տեղեկացնում են նրանց զարգացումների վերաբերյալ, հաշվի են առնում նրանց զգայնությունները և շահերը։

«Իրանի ԱԳՆ-ն բազմիցս նշել է, որ այս նախագիծն իրենց կարմիր գծերը հաշվի է առնում և հնարավորություններ է ստեղծում իրենց համար։ Ես կարծում եմ՝ սա ուժի մեջ են»,- ասաց նա։

Ըստ նրա, ցանկացած երկրի պաշտոնական դիրքորոշում  հայտնում է տվյալ երկրի ԱԳՆ-ն, և իրենք էլ հիմնվում են Իրանի ԱԳՆ-ի հայտարարության վրա։

«Մենք հաշվի առնում ենք մեր հարևանների բոլոր կենսական շահերը,  Իրանի դեպքում այդ շահերը Հայաստանի հետ մեծամասամբ համընկնում են։ Իրանի կարմիր գծերը նույնպես հաշվի առնված են։ Դա առաջին հերթին  Հայաստանի կարմիր գիծն է, որ Հայաստան տարածքով արտատարածքային միջանցք չի լինելու»,-ասաց Ռուբեն Ռուբինյանը։