ՔՊ-ականները շաբաթ օրը, Փաշինյանի գլխավորությամբ, մեծ ժողով կանեն Արարատում

Euromedia24-ի տեղեկություններով՝ իշխանության ներկայացուցիչները շաբաթ օրը հավաքվելու են Արարատի մարզում՝ մեծ ժողովի։ 

ՔՊ կուսակցության աշխատակազմի ղեկավար Արուսյակ Մանավազյանը հայտնեց, որ դեկտեմբերի 27-ին Նիկոլ Փաշինյանի գլխավորությամբ կուսակցությունը Քաղաքական ժողով է հրավիրելու։ 

Ժողովին քննարկվելու են կուսակցական հարցեր, 2026թ-ի ընտրությունների հետ կապված հարցեր՝ նախընտրական ցուցակը, քարոզարշավի ձևաչափը, ինչպես նաև արդեն գալիք տարում խորհրդարանական աշխատանքների հետ կապված հարցեր։ 

Հարցին՝ քննարկվելու են եկեղեցու շուրջ առաջիկա զարգացումները, Մանավազյանն ասաց, որ դրա վերաբերյալ հարցեր չեն քննարկելու։ ՔՊ քաղաքական ժողովին մասնակցելու են վարչության անդամները, կուսակցության վերահսկող հանձնաժողովի անդամները, պատգամավորները, նախարարները, ԱԽ անդամները, վարչապետին ենթակա, Կառավարությանը ենթակա մարմինների ղեկավարները, մարզպետները, Հայաստանի Հանրապետության համայնքների ղեկավարները եւ ավագանու խմբակցության ղեկավարները, Տարածքային խորհուրդների նախագահները և ՔՊ Երիտասարդական կառույցի խորհրդի անդամները։ 

Կուսակցության կանոնադրության համաձայն՝ քաղաքական ժողովի նիստերը գումարվում են Վարչության որոշմամբ, բայց ոչ պակաս, քան տարին երկու անգամ: Քաղաքական ժողովը քննարկում է ընթացիկ, քաղաքական, առաջիկա ընտրություններին Կուսակցության մասնակցությանը վերաբերող և այլ օրակարգային հարցեր: Վարչության որոշմամբ Քաղաքական ժողովի նիստին կարող են հրավիրվել կուսակցության անդամ հանդիսացող եւ չհանդիսացող այլ անձինք: