Զելենսկին գնահատել է Ուկրաինայի դեմ գիշերային հարվածների պատճառած վնասը

Ուկրաինայի նախագահ Վլադիմիր Զելենսկին հայտնել է, որ գիշերը երկիրը ենթարկվել է հերթական լայնածավալ հարձակման և գնահատել է դրա հետևանքով առաջացած վնասը։ Նրա խոսքով՝ հարվածները հասցվել են անօդաչու թռչող սարքերի և հրթիռների կիրառմամբ։

Զելենսկիի տվյալներով՝ գիշերվա ընթացքում Ուկրաինայի ուղղությամբ արձակվել է մոտ 500 անօդաչու թռչող սարք, ինչպես նաև շուրջ 40 հրթիռ, այդ թվում՝ «Կինժալ» տիպի։ Նրա հայտարարության համաձայն՝ հարձակման հիմնական թիրախը եղել է Կիևը, մասնավորապես՝ էներգետիկ և քաղաքացիական ենթակառուցվածքները։

Ուկրաինայի նախագահի փոխանցմամբ՝ մայրաքաղաքի և շրջանի մի շարք հատվածներում առկա են էլեկտրամատակարարման և ջեռուցման խափանումներ, շարունակվում է հրդեհների մարումը։ Որոշ էներգետիկ օբյեկտներում արդեն սկսել են աշխատանքները վերանորոգման խմբերը, իսկ մյուսներում մասնագետները սպասում են օդային տագնապի ավարտին՝ աշխատանքները սկսելու համար։ Ավելի վաղ Զելենսկին նաև հայտարարել էր, որ Բելառուսը աջակցում է Ռուսաստանին Ուկրաինայի դեմ հարձակումների իրականացման հարցում։