Զելենսկին մեղադրել է Ռուսաստանին՝ Բելառուսի տարածքը Ուկրաինայի պաշտպանության շրջանցման համար օգտագործելու մեջ

Ուկրաինայի նախագահ Վլադիմիր Զելենսկին հայտարարել է, որ Ռուսաստանը Բելառուսի տարածքն օգտագործում է Ուկրաինայի պաշտպանական համակարգը շրջանցելու և հարվածներ հասցնելու համար։ Նրա խոսքով՝ ռուսական ուժերը Բելառուսի սահմանամերձ բնակավայրերում, այդ թվում՝ բազմաբնակարան շենքերի վրա, տեղադրում են սարքավորումներ, որոնք օգնում են հարվածային անօդաչուների ուղղորդմանը Ուկրաինայի տարածքում։ Այդ մասին Զելենսկին գրել է Telegram-ում՝ զինվորական խորհրդակցությունից հետո:

Ուկրաինայի նախագահի պնդմամբ՝ հինգհարկանի սովորական բնակելի շենքերի տանիքներին տեղադրված ալեհավաքներն ու այլ տեխնիկան օգտագործվում են «Շահեդ» տիպի անօդաչուները Ուկրաինայի արևմտյան շրջաններ ուղղորդելու համար։ Նա այս քայլը որակել է որպես մարդու կյանքի հանդեպ բացարձակ անտեսում և զգուշացրել, որ նման գործողությունները վտանգավոր են նաև հենց Բելառուսի համար՝ նշելով, որ Մինսկը փաստացի զիջում է իր ինքնիշխանությունը Ռուսաստանի ռազմական նպատակներին:

Միաժամանակ արևմտյան ԶԼՄ-ներում հայտնվել են տեղեկություններ, ըստ որոնց՝ Ռուսաստանը կարող է Բելառուսի արևելքում տեղակայել նոր՝ միջուկային լիցք կրելու հնարավորություն ունեցող «Օրեշնիկ» հիպերձայնային բալիստիկ հրթիռներ։ ԱՄՆ հետազոտողների գնահատմամբ՝ արբանյակային պատկերները վկայում են նախկին ռազմաօդային բազայի տարածքում ակտիվ շինարարական աշխատանքների մասին, որոնք բնորոշ են ռազմավարական հրթիռային օբյեկտներին։ Բելառուսի իշխանությունները մասամբ հաստատել են նման զինատեսակի տեղակայումը, սակայն չեն հստակեցրել դրա գտնվելու վայրը: