Տաջիկստան–Աֆղանստան սահմանին լարվածությունը սրվում է․ հարձակումների թիրախում՝ չինացի քաղաքացիներ

Տաջիկստան–Աֆղանստան սահմանին վերջին շաբաթներին արձանագրվել են մի շարք զինված միջադեպեր, որոնք հանգեցրել են մարդկային զոհերի և լուրջ լարվածության տարածաշրջանում։ Տաջիկստանի իշխանությունների տվյալներով՝ դեկտեմբերին մի քանի անգամ անհայտ զինված խմբավորումների անդամներ ներթափանցել են երկրի տարածք, ինչի հետևանքով տեղի ունեցած բախումների ընթացքում զոհվել է ավելի քան մեկ տասնյակ մարդ, այդ թվում՝ Չինաստանի քաղաքացիներ, որոնք աշխատում էին հեռավոր լեռնային շրջաններում:

Տաջիկ կողմը հայտարարել է, որ հարձակումները կազմակերպվել են Աֆղանստանի Բադախշան նահանգի տարածքից և դրանք վկայում են Աֆղանստանի ներկայիս իշխանությունների՝ անվտանգության ապահովման հարցում պարտավորությունների չկատարման մասին։ Ըստ պաշտոնական Դուշանբեի՝ նոր օրենքների և իրավիճակի սրման ֆոնին ուժային կառույցները ստիպված են դիմել կոշտ միջոցների՝ սահմանային անվտանգությունը վերահսկելու համար։ Միևնույն ժամանակ փորձագետները նշում են, որ հարձակումների հիմնական թիրախը եղել են չինական ընկերություններն ու աշխատակիցները, ինչը խնդիրը դարձնում է նաև տարածաշրջանային ու միջազգային նշանակության:

Վերլուծաբանների կարծիքով՝ հարձակումների հետևում կարող է կանգնած լինել «Իսլամական պետություն» խմբավորման Խորասան ճյուղը, որի նպատակն է խարխլել Թալիբանի իշխանությունների հեղինակությունը և ցույց տալ, որ նրանք ի վիճակի չեն վերահսկել անվտանգությունը։ Չնայած Թալիբանի հայտարարություններին՝ ՄԱԿ-ի զեկույցները փաստում են, որ Աֆղանստանի տարածքում շարունակում են գործել մի շարք զինված խմբավորումներ, ինչը Տաջիկստան–Աֆղանստան հարաբերությունները պահում է լարված և անկայուն վիճակում: