Միսիսիպիի սինագոգում հրդեհից վնասվել կամ կորել են սրբազան առարկաներ

ԱՄՆ-ի Միսիսիպի նահանգի Ջեքսոն քաղաքում գտնվող ամենախոշոր և հնագույն սինագոգում՝ Beth Israel Congregation-ում, ենթադրյալ հրկիզումից հետո վնասվել կամ ամբողջությամբ ոչնչացվել են բազմաթիվ կարևոր սրբազան առարկաներ, այդ թվում՝ աղոթագրքեր, Մովսես մարգարեի քանդակ և շոֆար կոչվող սուրբ եղջյուր։ CNN-ի փոխանցմամբ՝ 19-ամյա կասկածյալը կարճ ժամանակ անց խոստովանել է հարձակումը՝ նշելով, որ այն իրականացրել է շենքի հրեական պատկանելության պատճառով։

Հրդեհից հետո սինագոգը փակվել է անորոշ ժամանակով, իսկ համայնքը սկսել է վերականգնման և կորուստների հաշվառման աշխատանքները։ Սինագոգի նախագահ Զաք Շեմփերի խոսքով՝ առաջին քայլերից մեկը եղել է Թորայի մագաղաթների դուրսբերումը և ապահով վայր տեղափոխումը, որպեսզի հնարավոր լինի հետագայում փորձագիտական գնահատում և վերականգնում։ Հրդեհից խիստ վնասվել է նաև գրադարանը, որտեղ պահվող աղոթագրքերը՝ ըստ հրեական ավանդույթի, կթաղվեն հատուկ արարողությամբ, այլ ոչ թե պարզապես դուրս կհանվեն։

Հրդեհի հետևանքով գրեթե ամբողջությամբ հալվել է նաև «Կյանքի ծառ» խորհրդանշական արվեստային գործը, իսկ տասնամյակներ առաջ ստեղծված Մովսեսի քանդակը, որը ժամանակին դիմակայել էր անգամ 1967 թվականի պայթյունին, այս անգամ վնասվել է՝ կորցնելով գլուխը։ Մինչ օրս չի հաջողվել գտնել նաև շոֆարը՝ կենդանական եղջյուրից պատրաստված սրբազան երաժշտական գործիքը։ Չնայած ծանր կորուստներին՝ համայնքի ներկայացուցիչները հայտարարել են, որ պատրաստ են վերակառուցել սինագոգը և պահպանել հրեական համայնքային կյանքը Ջեքսոնում։