Թրամփը հատել է «կարմիր գծերը»․ Գերմանիա

ԱՄՆ նախագահ Դոնալդ Թրամփի հայտարարությունները ԱՄՆ-ին Գրենլանդիայի հնարավոր անդամակցության մասին, ինչպես նաև եվրոպական պետությունների դեմ 10 տոկոսանոց սակագների սահմանումը «կարմիր գիծ» են դարձել Եվրամիության համար: Նման հայտարարությամբ հանդես է եկել Գերմանիայի փոխկանցլեր Լարս Կլինգբայլը, փոխանցում է Bloomberg-ը։

«Մենք մշտապես բախվում ենք նոր սադրանքների և դիմակայության, որին ձգտում է նախագահ Թրամփը, ուստի մենք՝ եվրոպացիներս, պետք է հստակ հասկացնենք, որ սահմանը հատված է», - ասել է քաղաքական գործիչը:

Վերջինս նշել է, որ Եվրամիության տրամադրության տակ արդեն գոյություն ունի օրենսդրորեն ամրագրված գործիքակազմ, որը թույլ է տալիս արձագանքել նման «տնտեսական շանտաժին»: Նրա կարծիքով՝ եվրոպական երկրները պետք է դիտարկեն դրանց կիրառման հնարավորությունը։