Մասյացոտնի թեմի եկեղեցիներում գրոհ է սկսվել․ Գևորգ սրբազանը ճնշումներ է սկսել քահանաների հանդեպ

Մասյացոտնի թեմի նախկին առաջնորդ Գևորգ եպիսկոպոս Սարոյանը երեկվանից սկսել է միջնորդավորված հանդիպումներ փնտրել այն քահանաների հետ, որոնք իր պաշտոնանկությունից հետո այլևս ենթակա չեն իրեն։ Հարկադրանքով, ըստ աղբյուրի, համոզում է թեմի քահանաներին իր կողմն անցնել կամ լքել եկեղեցին, եթե որպես հոգևոր սպասավոր չեն ընդունում Գևորգ սրբազանի առաջնորդ լինելը և սատարումը իշխանությունների կողմից։

Քահանաները համատարած դիմադրում են, չեն ենթարկվել ճնշումներին և հայտարարել են, որ իրենք նշանակված են ծառայության Մայր Աթոռի կողմից ու ենթակա են Ռուբեն վարդապետ Զարգարյանին, ում Մայր Աթոռից նշանակել են տեղապահ Մասյացոտն թեմում։

Ընդգծենք, մինչ այս պահը չկա Մայր Աթոռ Սուրբ Էջմիածնից որևէ հրապարակային արձագանք կամ որոշում՝ Վեհափառ Հայրապետի կողմից Գևորգ սրբազանին պաշտոնանկ անելու որոշումը վիճարկող բողոքի հիման վրա առաջին ատյանի դատարանի ընդունած միջանկյալ ապահովման մասին կայացրած աղմկահարույց որոշման վերաբերյալ, իսկ դա նշանակում է, որ Գևորգ սրբազանն անցել է ինքնիրավչության։

Euromedia24-ի տեղեկություններով ճնշումները սկսվել են Սպարապետ Վազգեն Սարգսյանի ծննդավայր Արարատ գյուղի եկեղեցուց (Դավալուի Սուրբ Աստվածածին եկեղեցու հոգևոր սպասավորից)։

Արարատ գյուղի եկեղեցու քահանային, ըստ աղբյուրի, կանգնեցրել են կոշտ երկընտրանքի առաջ՝ կամ լքել եկեղեցին, կամ ընդունել Գևորգ եպիսկոպոս Սարոյանին որպես թեմակալ առաջնորդ՝ հիմնավորելով, թե կա դատարանի որոշում, ուստի դիմակայությունը կարժանանա ծանր որոշման՝ հեռացվել թեմից։ Քահանան հրաժարվել է կատարել պահանջը, ինչից հետո նրա նկատմամբ սկսվել է հոգեբանական ճնշում։

Հաջորդիվ տարբեր բանագնացներ, այդ թվում ՏԻՄ աշխատակիցներ, են մոտեցել ուրիշ քահանաների։ Նրանցից մեկին ընդհուպ սպառնալիքի տոնով են նույն պահանջները ներկայացրել՝ հավանաբար կոշտ դիմադրության հանդիպելով։ Սույն քահանայի հետ երեկվանից կապ հաստատել չի հաջողվում․ անջատած է հեռախոսը։ Մյուս կողմից՝ Գևորգ սրբազանն է պաշտպանվում լրագրողներից՝ կեսից անջատելով իր համար անցանկալի համարներից հեռախոսազանգերը։

Նամակներով փորձել ենք պարզաբանում ստանալ, թե ինչ իրավունքով և արդյոք ինքնիրավչության գործողություն չէ իր քայլերը, ինչ իրավունքով է աշխարհիկ մարդկանց ուղեկցությամբ նաև եկեղեցու վրա գրոհի հերթական քայլեր անում եպիսկոպոսը՝ չսպասելով դատարանի որոշման կատարմանը, ով է ներգրավել ՏԻՄ ներկայացուցիչներին, ում հրահանգով են նրանք ուղեկցում այլ հոգևորականներին՝ եկեղեցի, և բանակցում Մայր Աթոռից նշանակվածների հետ։

Euromedia24-ը ոչ մի կերպ չի կարողանում ստանալ այս և այլ հարցերի վերաբերյալ Մասյացոտն թեմի նախկին առաջնորդ Գևորգ եպիսկոպոս Սարոյանի պատասխանները։ Ավելի ուշ հայտնի դարձավ, որ Վեդի խոշորացված համայնքի ղեկավար, ՔՊ-ական Գարիկ Սարգսյանն է Վեդու եկեղեցի մտել առավոտյան և չի սպասել ուշացող քահանային։ Իր փոխարեն իր ենթականերից՝ քաղաքապետարանի աշխատող ոմն Մեխակ Խոստեղյանն է հօգուտ Տիրադավ հռչակված եպիսկոպոսի բանակցություններ վարել քահանայի հետ, և անօգուտ։ Աղբյուրը հավելեց նաև, որ նոր նշանակված քահանա կա Վեդու եկեղեցում, ընդ որում նա Փաշինյանի հակաեկեղեցական արշավին միացածներից է, իսկ նշանակողը՝ Մայր Աթոռի կադրային ռեզերվում հայտնված պաշտոնանկ թեմակալ Գևորգ սրբազանը։